నవంబర్ 1, 2008

ఉబుంటు ఇంట్రెపిడ్ ఐబెక్స్ ..

Posted in ఇంట్రెపిడ్, ఉబుంటు, టెక్నాలజీ, లినక్సు, linux, ubuntu వద్ద 3:02 సా. ద్వారా Praveen Garlapati

.మొన్న సెప్టెంబరు ౩౦ న ఉబుంటు ఇంకొక సరికొత్త నవీకరణ (8.10) విడుదలయింది. (ఇంట్రెపిడ్ ఐబెక్స్, ఇంకో చిత్రవిచిత్రమయిన పేరు 🙂

* ఉబుంటు మీద ఇంతకు ముందు నా టపాలు ఇక్కడ చూడవచ్చు.

ఇది LTS (Long Term Support) రిలీజు కాదు. కాకపోతే కొన్ని చక్కని మార్పులు చేసారు ఇందులో.

మీరు ఇప్పటికే ఉబుంటు 8.04, హార్డీ హెరాన్ గనక ఉపయోగిస్తున్నట్టయితే ఈ రిలీజుకి నవీకరించడానికి ఈ కింది కమాండుని ఉపయోగించండి.

sudo apt-get dist-upgrade

౧. గ్నోమ్ 2.24: ఉబుంటు ఇంట్రెపిడ్‌లో గ్నోమ్‌ కొత్త నవీకరణ 2.24 ని జతచేసారు.

౨. గెస్ట్ సెషన్: మీరు మీ కంప్యూటరుని వాడుతున్నారు. మీ స్నేహితుడో, మీ ఇంట్లో వాళ్ళో కాసేపు కాసేపు మీ కంప్యూటరుని వాడాలనుకున్నారు. కానీ మీ సిస్టంని వారికి అప్పగించడానికి మీకు ఇష్టముండకపోవచ్చు. మీ ప్రైవేటు ఫైళ్ళు ఎవరయినా చూస్తారేమోనని లేదా ఏదయినా ఫైళ్ళు పొరపాటున తొలగిస్తారని భయముండవచ్చు.
అలాంటి పరిస్థితులలో ఉపయోగించడానికే ఈ కొత్త వర్షనులో గెస్ట్ అకౌంటుని జతచేసారు. మీరు ఎంచగ్గా ఆ అకౌంటుకి స్విచ్ చేసి మీ స్నేహితులకి సిస్టం అప్పగించవచ్చు. ఆ అకౌంటు ద్వారా సిస్టంలో ఏ మార్పులూ చెయ్యలేరు. ఏదయినా చేసినా అవి /tmp ఫోల్డరులోకి వెళతాయి కాబట్టి లాగౌట్ అయిన వెంటనే అన్నీ మాయం.

౩. ప్రైవేటు ఫోల్డరు: మీ సిస్టంలో ఎవరూ చూడదనుకున్న ఫైళ్ళు ఉన్నాయనుకోండి. అది మీ అకౌంటుకి తప్పితే ఎవరూ ఆక్సెస్ చెయ్యకూడదనుకుంటే ఆ సదుపాయం ఈ వర్షనులో ఉంది.
ఈ కింది కమాండులను మీ సిస్టంలో ఇవ్వండి

sudo apt-get install ecryptfs-utils
ecryptfs-setup-private

ఇప్పుడు మీ హోమ్‌ ఫోల్డరు (/home/) లో “ప్రైవేట్ (Private)” అని ఒక ఫోల్డరు కనబడుతుంది. అందులో దాచిన ఏ ఫైలు అయినా ఎన్‌క్రిప్ట్ అయి ఉంటుంది. అది మీ అకౌంటుకి తప్ప ఎవరికీ ఆక్సెస్ అవవు. బాగుంది కదూ ?

౪. యూఎస్‌బీ డిస్క్: ఇప్పుడు మీరు మీ ఉబుంటు ఇన్‌స్టాలేషనుని మీరు ఇప్పుడు మీతో పాటూ ఎక్కడికి కావాలంటే అక్కడికి తీసుకు వెళ్ళవచ్చు. ఇది తయారు చెయ్యడానికి ఒక ఉపకరణం ఇంట్రెపిడ్‌లో జత చేసారు.
కాకపోతే దీనికోసం మీకు ఉబుంటు ఇంట్రెపిడ్ iso కానీ సీడీ కానీ అందుబాటులో ఉండాలి. ఈ ఉపకరణం మీ ఉబుంటుని యూఎస్‌బీ మీదకి కాపీ చేస్తుంది. మీ సెట్టింగులు గట్రా కూడా యూఎస్‌బీ మీదే ఉంటాయి.

౫. నాటిలస్ లో ఇప్పుడు టాబులు: గ్నోమ్‌ నాటిలస్ ఫైలు మేనేజరులో ఇంతకు ముందు వరకూ టాబులు లేవు. ఈ రిలీజులో ఆ ఫీచరు ఉంది.

౬. కేడీయీ 4.1: కేడీయీ వర్షనయిన కుబుంటులో ఈ సారి కేడీయీ 3.5 నుంచి 4.1 కి నవీకరించబడినది. ఇది ఒక పెద్ద మార్పు. ఎందుకంటే కేడీయీ 4 ఇంతకు ముందు కేడీయీ వర్షనులకంటే సమూలంగా మార్పు చెందింది. దాని గురించి నా ఇంతకు ముందు టపా చూడవచ్చు.

ఇవి కాక ఇతర ఉపకరణాలన్నీ నవీకరించబడినవి.

గత కొంత కాలంగా ఇంట్రెపిడ్ ఆల్ఫా వాడుతున్న నా అనుభవాలు:

౧. కేడీయీ 4.1 నాకు అంతగా నచ్చలేదు. సంపూర్ణంగా స్టేబుల్ అయిన పాడక్టు కాదని నా అభిప్రాయం. అవడానికి చక్కని ఐ కాండీ అయిన ఈ వర్షను ఇంతకు ముందు వర్షనయిన కేడీయీ 3.5 అంత స్టేబుల్ గా లేదు.
ఇంకా చెప్పాలంటే గత కొంత కాలంగా నేను కేడీయీ లోకి లాగిన్ అవలేకపోయాను. లాగిన్ అవగానే ఫ్రీజ్ అవుతుంది. కాబట్టి ఇది నాకు పెద్ద ఫ్లాప్. కానీ మిగతా వారికి సరిగానే పని చేస్తున్నట్టుంది.

౨. ఎవల్యూషన్ యొక్క సరికొత్త నవీకరణలో సమస్యలున్నాయి. OWA https యూఆర్‌ఎల్ తో ఇది సరిగా పని చెయ్యదు. కాబట్టి మీ కంపెనీ కనుక మైక్రోసాఫ్ట్ ఎక్స్చేంజ్ వాడుతుంటే మీరు ఐమాప్ ప్రోటోకాలు ఉపయోగించాలి లేదా మీ ఎక్చేంజ్ సర్వరు http ప్రోటోకాల్‌కి మద్దతునివ్వాలి.

౩. ఎక్స్ విండోస్ ఈ రిలీజులో చాలా నిలకడగా ఉంది. డ్యూవల్ మానిటర్ సెటప్ లాంటివి సులభంగా చెయ్యవచ్చు.

౪. నెట్‌వర్క్ మేనేజరు చాలా చక్కగా పని చేస్తుంది ఈ రిలీజులో. మీ ఇంటర్ఫేసులన్నిటినీ ఇది అద్భుతంగా నిర్వహిస్తుంది. వైర్‌లెస్ సమస్యలు దాదాపుగా తీరినట్టే.

చివరగా నా ఇంట్రెపిడ్ గ్నోమ్‌ డెస్కుటాపు చిత్రంతో ముగిస్తాను 🙂

Loading image

Click anywhere to cancel

Image unavailable

ఏప్రిల్ 25, 2008

కుబుంటు హార్డీ హెరాన్ …

Posted in ఉబుంటు, కుబుంటు, టెక్నాలజీ, లినక్సు వద్ద 5:26 సా. ద్వారా Praveen Garlapati

ఉబుంటు/కుబుంటు మరో సరికొత్త రిలీజుతో ఆకట్టుకుంది. సరికొత్తగా విడుదలయిన రిలీజు పేరు “హార్డీ హెరాన్“.

ఉబుంటు/కుబుంటు గురించి తెలియని వారికి, ఇది ఒక లినక్సు డిస్ట్రిబ్యూషను. డెబియన్ డిస్ట్రిబ్యూషను నుంచి వచ్చినది. ప్రతీ ఆరు నెలల రిలీజుతో “యూజబిలిటీ” మీద ప్రత్యేక దృష్టి కేంద్రీకరిస్తూ దూసుకుపోయే ఒక మంచి డిస్ట్రిబ్యూషను ఇది.
గత కొద్ది ఏళ్ళుగా డేస్క్‌టాప్ పైన విండోసుకి బలమయిన ఉచిత ప్రత్యామ్నాయంగా ఎదిగిన ఆపరేటింగ్ సిస్టం ఇది.

అన్నట్టు ఇది ఒక ఎల్టీఎస్ (Long Term Support) రిలీజు. అంటే ఒక మూడేళ్ళ వరకూ సపోర్టు ఉండే రిలీజన్నమాట. అదీ ఉబుంటు సమస్యలను ఎంత తొందరగా పరిష్కరిస్తుందో వాడిన వారందరికీ తెలిసే ఉంటుంది.

ఈ రిలీజుతో పాటు ఎన్నో చక్కని ఫీచర్లు వచ్చాయి. కొన్ని ఈ కింద.

అన్నిటికన్నా నాకు బాగా నచ్చింది

వుబీ ఇంస్టాలర్: ఎందుకంటారా ? దీని ద్వారా ఇప్పుడు విండోసులోనే ఉబుంటు ని స్థాపించుకోవచ్చు. అంటే మీకు మరో పార్టీషను లేకపోయినా ఫరవాలేదు. మీరు చెయ్యవలసిందల్లా ఈ ఉబుంటు/కుబుంటు సీడీ దొరకబుచ్చుకుని విండోసులో తెరవండి. మీకు ఒక చిన్న విజర్డ్ ని చూపిస్తుంది. దానినుపయోగించి ఉబుంటుని విండోసులో ఒక అప్లికేషనులాగా ఇంస్టాల్ చేసుకోవచ్చు.

ఈ కింది బొమ్మ చూడండి.

ఉబుంటు కి ఎంత స్థలం కేటాయించాలనుకుంటున్నారో చెప్పండి. అంతే. ఒక సారి రీబూట్ అవగానే మీ సిస్టమ్‌ లో ఉబుంటు స్థాపితమయిపోతుంది.
కంప్యూటరు బూటవుతున్నప్పుడు ఉబుంటు/కుబుంటు ఎంచుకోండి. ఝామ్మని వాడెయ్యండి.

ఇప్పుడర్థమయిందా ? నాకెందుకు నచ్చిందో. విండోసు వాడుకదారులని లినక్సుకి మరల్చడంలో ఇదెంతో సహాయపడుతుందని నా నమ్మకం. అంత రూఢిగా ఎలా చెబుతున్నానంటారా ? ఇప్పటికే నలుగురిని ఇలా మార్చా కాబట్టి 🙂 (అందులో మన రానారె ఒక్కడు)

ఇంకా ఈ రిలీజులో కేడీయీ ౪ ఇంటిగ్రేట్ చెయ్యబడి ఉంది. అదేంటంటారా ? నా ఇంతకు ముందు టపా ఓ సారి చదవండి.

కేడీయీ ౪ సరికొత్త రూపం. కొత్త ప్రయోగం. ఇప్పుడిప్పుడే విడుదలవుతుంది గనుక రఫ్ గా ఉంటుంది. కానీ ఇప్పుడే ఇలా ఉంటే రేప్పొద్దున్న ఎంత ఎక్సైటింగుగా ఉంటుందో ఓ సారి ఊహించుకోండి.

విడ్జెట్లు, ఎఫెక్ట్లతో తప్పకుండా ఆకట్టుకుంటుంది.

ఇకపోతే కాంపిజ్ కి చెందిన డెస్క్‌టాప్ ఎఫెక్ట్లు ఇప్పుడు కేడీయీలో సులభంగా ఎంచుకోవచ్చు.

లినక్సు లో ఇంటర్ఫేసు కి హంగులు లేవని అనే వారికి ఇవి చూసిన తరువాత దిమ్మతిరుగుతుంది. కాంపిజ్ ద్వారా ఎలాంటి ఎఫెక్ట్లు మీకు లభ్యమవుతాయో మచ్చుకు ఈ లంకెలో ఉన్న తెరచాపలను చూడండి.

ఇవి కొన్ని ఫీచర్లూ, మార్పులూ మాత్రమే. ఉబుంటు ని స్థిర పరచడానికి, ముందు ముందు చక్కని రిలీజులు చెయ్యడానికి మన కంటికి కనిపించని ఎంతో పని ఈ రిలీజు మీద జరిగింది.

పూర్తి ఫీచర్ల గురించి తెలుసుకోవాలంటే ఈ లంకె చూడండి.

అన్నట్టు మీకు తెలియకపోతే ఉబుంటు/కుబుంటు సీడీలు మీకు ఉచితంగా పంపిణీ చెయ్యబడతాయి. ఎన్ని కావాలంటే అన్ని. ఇక్కడకెళ్ళి అడగొచ్చు. అందరికీ పంచగలిగినన్ని సీడీలు తెప్పించుకుని అందరికీ ఇవ్వవచ్చు. అంత వరకూ ఆగలేకపోతే దీనిని ప్రయత్నించి చూడడానికి మీకయ్యే ఖర్చల్లా ఒక్క సీడీ మాత్రమే. ఇక్కడ నుంచి ఐఎస్‌ఓ ని తెచ్చుకుని సీడీ తయారు చేసుకోండి. అంతే.

కుబుంటు ని ఎలా వాడాలో కొత్తగా వాడేవారికి నా ఈ టపా ఉపయోగపడవచ్చు.

మరోసారి జై బోలో కుబుంటు కీ !

డిసెంబర్ 22, 2007

విండోసు లాపుటాపు పై లినక్సు… నా తంటాలు…

Posted in ఉబుంటు, కుబుంటు, టెక్నాలజీ, తంటాలు, లినక్సు, linux, NTFS, ubuntu, VPN, wireless వద్ద 2:22 సా. ద్వారా Praveen Garlapati

ఈ రోజు ఎంత సంతోషంగా ఉందో చెప్పలేను.

ఎట్టకేలకు నా లాపుటాపు ని కూడా కుబుంటు తో లోడు చేసాను. దానికి ఇన్నాళ్ళు తీసుకోవడానికి చాలా కారణాలున్నాయి.
మొదటిది మా కంపెనీ వారు లాపుటాపుల మీద లినక్సు ని సపోర్టు చెయ్యరు. వారు చెయ్యకపోయినా ఫరవాలేదు కానీ కొన్ని అప్లికేషన్ల కోసం విండోస్ కావాల్సిందే. ఎలాంటివంటే “ఐపీ కమ్యూనికేటరు” వంటివి. కాబట్టి రెండూ ఉండేలా “డ్యూవల్ బూట్” చెయ్యాలి.

ఈ క్రమంలో నే పడ్డ బాధలు అన్నీ ఇన్నీ కావు. ఎట్టకేలకు సాధ్యమయింది.

ఇది సాధించడానికి నే చేసినవి ఈ క్రమంలో:

నా లాపుటాపు లో ఒకే పార్టీషనుంది. లినక్సు ఇన్స్టాలు చెయ్యాలంటే ఇంకో పార్టీషను కావాలి. కానీ ఫార్మాట్ చేస్తే ఇంతవరకూ విండోస్ లో ఉన్న డాటా, ఇన్స్టాలు చేసిన అప్లికేషన్లూ పోతాయి. అందుకని రీపార్టీషన్ చెయ్యాలి. కానీ డాటా లాస్ కాకుండా. FAT, FAT32 వంటి ఫైల్ సిస్టంలైతే పెద్ద కష్టం కాదు కానీ NTFS కి సపోర్టు తక్కువే.
మొదట కుబుంటు “లైవ్ సీడీ” లో ఉన్న QTParted టూల్ ని ఉపయోగించి రీసైజు చెయ్యడానికి ప్రయత్నించాను. కానీ ఫెయిలయింది. ఎందుకంటే డిస్కు ని నేను దాదాపు ఎన్నో నెలలుగా “డీఫ్రాగ్” చెయ్యలేదు.

* మన హార్డు డిస్కు ఉపయోగించిన కొద్దీ అందులో స్టోర్ చేసే ఫైళ్ళు చెల్లా చెదురుగా పడుంటాయి. ఎందుకంటే కొన్నాళ్ళుగా మనం ఇన్స్టాలు, అనిన్స్టాలు, క్రియేటు, డిలీటు వంటివి మన ఫైళ్ళతో చేస్తుంటాము. కాబట్టి ఫైళ్ళన్నీ హార్డు డికులో అక్కడా ఇక్కడా ఉంటాయి. దానినే ఫ్రాగ్మెంటేషన్ అంటారు. దానిని తొలగించే విధానాన్ని డీఫ్రాగ్మెంటేషన్ అంటారు.

విండోస్ లో డీఫ్రాగ్మెంటు చెయ్యడానికి యుటిలిటీలుంటాయి. విండోస్ తో వచ్చే యుటిలిటీ అంత సమర్థవంతంగా డీఫ్రాగ్ చెయ్యదు. తర్డు పార్టీ యూటిలిటీలుంటాయి ఉదా: jkdefrag, Diskeeper వంటివి.

నేను jkdefrag ఉపయోగించాను. డీఫ్రాగ్ అయితే సమర్థవంతంగా అయింది కానీ అయినా పనిచెయ్యలేదు. ఎందుకంటే MBR, Pagefile వంటి వాటిని అది కూడా డీఫ్రాగ్ చెయ్యలేదు కనక. చివరికి Diskeeper అనే సాఫ్టువేరు ఉపయోగించాను. ఇది బూట్ టైం లోనే డీఫ్రాగ్ చేస్తుంది కాబట్టి వాటిని కూడా డీఫ్రాగ్ చెయ్యగలిగింది.

హమ్మయ్య… ఆఖరికి ఎలాగయితే QTParted ఉపయోగించి పార్టీషను ని రీసైజు చెయ్యగలిగాను. ఒక పది జీబీ స్పేసు తో వేరే పార్టీషను ని సృష్టించాను.

తర్వాతదంతా ఈజీనే. కుబుంటు ఇన్స్టాల్ చెయ్యడానికి అక్షరాలా పదిహేను నిముషాలు పట్టింది. తర్వాత అప్డేట్లు ఒక పది నిముషాలు. కావలసిన ఫైర్ఫాక్సు, థండర్బర్డు మొదలయినవి ఇంకో అయిదు నిముషాలు.

మొట్ట మొదట నాకు కావాల్సింది విండోసు లోని డాటా. అది ఒక్క కమాండు దూరం అంతే. ఆ పార్టీషనుని “మౌంటు” చెయ్యగానే డాటా అంతా లభ్యం. ఇంతకు ముందయితే NTFS కి రీడ్ ఓన్లీ సపోర్టు ఉండేది, కానీ ఇప్పుడు “ntfs-3g” డ్రైవరుని కుబుంటు లో ఇంటిగ్రేటు చెయ్యడంతో రీడ్ రైటు సపోర్టు వచ్చేసింది. అంటే మీ విండోసు డ్రైవు ని కూడా మౌంటు చేసి ఆ స్పేసు ని ఉపయోగించుకోవచ్చు అన్నమాట. (ఇందులో ఉన్న ఒకే చిక్కేమిటంటే ntfs-3g డ్రైవరు విండోసు హైబర్నేటు అయి ఉంటే పని చెయ్యదు.)

ఎలాగూ నాకు కావలసిన ఆఫీసు సాఫ్టువేరు “ఓపెన్ ఆఫీసు” ఇన్స్టాల్ అయే ఉంది. కాబట్టి ఇక కావలసింది మైక్రోసాఫ్టు ఎక్ష్చేంజ్ సర్వరు కి కనెక్టు కావడానికి మెయిల్ క్లైంటు. అవుట్లుక్ కి దగ్గరగా వచ్చే క్లైంటు లినక్సు లో “ఎవల్యూషన్“. అది కాలెండరింగు కూడా సపోర్టు చేస్తుంది.

తర్వాతది మెసెంజరు. పిడ్జిన్ (ఇంతకు ముందు గెయిమ్) ని మించింది ఏది ?

ఇంక నాకు తలెత్తిన సమస్య ఆఫీసు వైరులెస్సు కి కనెక్టు కావడం. మా వైరులెస్సు నెట్వర్కు “EAP-FAST” ఆథెంటికేషను వాడుతుంది. కుబుంటు లో మామూలు అనాథెంటికేటెడ్, లేదా WEP ఆథెంటికేషను సపోర్టు ఉంది కానీ EAP-FAST కి సపోర్టు లేదు. wpasupplicant పాకేజీ ని openssl సపోర్టు తో కంపైల్ చేస్తే పని చేస్తుంది. ఆ పాకేజీని మార్చేంత సీను నాకు లేకపోవడంతో కంపెనీలో ఆ సీనున్న వారితో చేయించి నడపగానే వైరులెస్సు తో కనెక్టయిపోయింది.
(చూసారా “ఓపెన్ సోర్సు” తో లాభాలు. అదే ఏదయినా క్లోస్డ్ సోర్సు ఆపరేటింగు సిస్టమయితే వారు సపోర్టు చేసేదాకా ఆగాల్సి వచ్చేది. కానీ ఇప్పుడయితే ఎంచగ్గా మనమే సోర్సు మార్చేసుకుని సమస్యను పరిష్కరించుకోవచ్చు.)

ఇక తరవాతది వీపీఎన్ ఆక్సెసు. మా కంపెనీ ఉపయోగించే వీపీఎన్ కి vpnc ఉపయోగించి కనెక్టు కావచ్చు. కానీ వీపీఎన్ కి కనెక్టు కావడానికి వన్‌టైము పాస్వర్డు సృష్టించే ఇంకో సాఫ్టువేరు ని జతగా వాడతారు. ఆ క్లయింటు ఏమో విండోసు మీద పనిచేసేది. ఇక దానికోసం వైన్ ఉపయోగించాల్సొచ్చింది. దాని కమాండు లైను వర్షను ఈఎక్షీ కనుగొని దానికి సంబంధించిన రిజిస్ట్రీ ఎంట్రీలను వైన్ కి జోడించడంతో అది లినక్సులో పనిచెయ్యడం మొదలెట్టింది. కానీ ఇక్కడ ఇంకో సమస్య తెలెత్తింది ఏంటంటే ఈ సాఫ్టువేరు ఒక dat ఫైలు ఉపయోగించుకుంటుంది. అది వన్‌టైము పాస్వర్డు సృష్టించిన ప్రతీ సారీ మారుతుంటుంది. మరి నేను దానిని లినక్సు లో వాడితే మరుసటి సారి అది విండోసు లో పని చెయ్యదు ఎందుకంటే ఆ dat ఫైలు సింక్రనైజు అయి ఉండదు కాబట్టి. దానికి నేనేమి చేసానంటే ఇంతకు ముందు మౌంటు చేసిన విండోసు పార్టీషను లో ఉన్న ఆ ఫైలుకి ఒక సింబాలిక్ లింకు సృష్టించాను. కాబట్టి ఇక ఆ dat ఫైలు మారినా సింక్రనైజ్డు గా ఉంటుందన్నమాట.
ఇక అక్కడితో దాదాపు అన్ని సమస్యలూ తీరినట్టే ఒక్కటి తప్ప.

అదేంటంటే ఇంట్లోంచి మీటింగులు అటెండు కావడానికి మేము “ఐపీ కమ్యూనికేటరు” (సాఫ్టు ఫోను) ఉపయొగిస్తాము. కానీ మేము వాడే ప్రోటోకాలు ఓపెన్ కాదు. కాబట్టి దానికి లినక్సు లో క్లయింటు దొరకలేదు. దానికి ఏదన్నా ప్రత్యామ్నాయం దొరికితే ఇక విండోసు లోకి బూటు చెయ్యాల్సిన అవసరమే లేదు. లేదా కనీసం క్లయింటుని వైను ద్వారా పరిగెత్తించగలిగితే సరిపోతుంది.

అదన్నమాట ఒక ప్రహసనం. ఒక రోజంతా కష్టపడినా సరే మొత్తానికి లినక్సు కి మారిపోవడం చాలా సంతోషాన్నిచ్చింది.

అన్నట్టు ఎవరయినా KDE4 ప్లాస్మా ట్రై చేసారా ? కొత్తగా తయారవుతున్నట్టుంది. మాక్ లాగా డాక్ బార్ అదీనూ… ఆల్రడీ కుబుంటు “హార్డీ” కోసం ఆల్ఫా వర్షను ఇంటిగ్రేట్ అయి ఉంది.

జూన్ 11, 2007

ఉబుంటు స్టార్టర్స్ …

Posted in ఉబుంటు, టెక్నాలజీ వద్ద 4:49 సా. ద్వారా Praveen Garlapati

ఉబుంటు కొత్తగా వాడటం మొదలెట్టిన వారికి కొన్ని సంగతులు.

ఉబుంటు కి అద్భుతమయిన డాక్యుమెంటేషన్ ఉంది. గూగుల్ లో వెతికితే ఉబుంటు హెల్ప్ లో గానీ ఉబుంటు ఫొరంస్ లో గానీ చటుక్కున సమాధానం దొరుకుతుంది.

ముందో మాట. మీరు రూట్ గాక ఇంకో యూజర్ సృష్టించే ఉంటారని ఆశిస్తున్నా. ఉబుంటు లో ఇది సృష్టించనిదే ఇన్స్టాల్ కానివ్వదనుకోండి. రూట్ యూజర్ ని డీఫాల్ట్ గా డిసేబుల్ చేసి ఉంచుతుంది. దానికి కారణం సెక్యూరిటీ. లినక్స్ లో రూట్ యూజర్ అంటే దేవుడు అన్నమాట. రూట్ యూజర్ గా లాగిన్ అయి ఉంటే పొరపాటున ఏదయినా తప్పు చేసే అవకాశం ఉంది. దాని వల్ల అనుకోని విధమయిన సమస్యలు రావచ్చు. అలాంటివి రాకుండా ముందు జాగ్రత్త చర్యగా రూట్ యూజర్ ని డిసేబుల్ చేసి ఉంచుతుంది.

మామూలు పనులు చేసుకోవడానికి ఆ యూజర్ సరిపోతుంది కానీ సిస్టం లో ఏదయినా మార్పులు చేర్పులు చెయ్యాలంటే మాత్రం రూట్ లేదా అడ్మినిస్ట్రేటర్ కుండే ప్రివిలేజస్ కావాలి. మరి మామూలు యూజర్ గా ఉన్నప్పుడు మార్పులు చెయ్యాలంటే ఎలా అనే సందేహం వచ్చిందా ?
మీరు మామూలు యూజర్ గా లాగిన్ అయినప్పుడు ఏదయినా ఇన్స్టాల్ చెయ్యలన్నా, సిస్టం లో ఏ మార్పులయినా చెయ్యాలన్నా టెంపరరీ గా రూట్ ప్రివిలేజస్ రావడానికి “sudo” అనే కమాండ్ ఉంది. దానిని వాడితే మీకు టెంపరరీగా రూట్ ప్రివిలేజస్ వస్తాయి.

ఉదాహరణకి మీరు ఏదయినా పాకేజీ ఇన్స్టాల్ చెయ్యాలనుకున్నారనుకోండి:

రూట్ అయితే

apt-get install <package-name>

అని ఇస్తే సరిపోతుంది. కానీ రూట్ గా కాక మామూలు యూజర్ గా ఉన్నప్పుడు మీరు

sudo apt-get install <package-name>

అని ఇవ్వాల్సుంటుంది. అపుడు మిమ్మల్ని పాస్వర్డ్ అడుగుతుంది. మీ యూజర్ పాస్వర్డ్ ఎంటర్ చెయ్యండి అంతే, పనిచేస్తుంది. (sudo గురించి ఇంకా ఉంది కానీ ఇక్కడ చెబితే అది పెద్ద తతంగం గా తయారవుతుంది. అందుకని ఇప్పటికి వదిలెయ్యండి. ఏదయినా టెంపరరీగా రూట్ ప్రివిలేజస్ కావాలంటే sudo వాడాలని మాత్రం గుర్తు పెట్టుకోండి.)

పైన చెప్పిన తతంగమంతా ఉబుంటు లో మీరు కమాండ్ లైన్ ఉపయోగిస్తేనే. ఉబుంటు లో చాలా మటుకు GUI తోనే పనులయిపోతాయి. అందుకనే అది అంతగా వ్యాప్తి చెందింది. సరే ఇక UI మాటకొస్తే ఏదయినా సిస్టం లో మార్పులు చెయ్యాలనుకున్నారనుకోండి ఉదాహరణకి System Settings అందులో కింద Administrator Mode అని ఒకటుంటుంది. ఆ బటన్ ని క్లిక్కి మీ యూజర్ పాస్వర్డ్ ఇచ్చి పని కానిచ్చుకోవచ్చు.

ఇదంతా మొదట్లో కలగాపులగం గా అనిపించవచ్చు కానీ దీని వల్ల ఎంతో మంచి జరుగుతుంది. అలవాటయిపోతుంది.

ఇక పోతే ఏదయినా పాకేజీ ఇన్స్టాల్ చెయ్యాలనుకుంటే ఎలా ?

అది చెప్పుకునే ముందు ఒక రెండు విషయాలు చెప్పుకోవాలి. ఉబుంటు లో డీఫాల్ట్ గా వచ్చే పాకేజీలలో సాధ్యమయినంత వరకూ ప్రొప్రయిటరీ డ్రైవర్లు/పాకేజీలను వాడరు. కానీ అవి కావాలనుకోండి అవి డౌన్లోడ్ చేసుకోవడం కోసం కావలసిన రిపాజిటరీలు ఉంటాయి. (ఉదాహరణకి ఫ్లాష్, జావా, ఎన్వీడియా డ్రైవర్లు మొదలయినవి.) డీఫాల్ట్ గా అవి ఎనేబుల్ అయి ఉండవు, వాటిని ఎనేబుల్ చెయ్యడానికి మీరు /etc/apt/sources.list అనే ఫైలులో కామెంట్ చేసి ఉన్న రిపాజిటరీలను మీకు కావలసిన విధంగా అన్‌కామెంట్ చెయ్యండి.

ఇక పాకేజీలేమిటి అంటే విండోస్ లో సెటప్ చెయడానికి ఇన్స్టాలర్లు ఉన్నట్టే లినక్స్ లో కూడా ఏ ఫ్లేవర్ కి కావలసిన విధంగా వాటికి పాకేజీలుంటాయి (ఉదాహరణకి డెబియన్/ఉబుంటు మొదలయిన వాటికి .deb, రెడ్‌హాట్/ఫెడోరా లకి .rpm, మొదలయినవి…)

ఇక పోతే మీరు ఇన్స్టాల్ చేసే పాకేజీలు ఇంటర్నల్ గా వేర్వేరు పాకేజీల మీద ఆధారపడి ఉండవచ్చు. అవన్నీ మీరు విడి విడి గా ఇన్స్టాల్ చేసుకోనక్కర్లేకుండా ఉబుంటు లో వివిధ రకాల టూల్స్ మీకు అందుబాటులో ఉంటాయి.

apt-get – ఆప్టిట్యూడ్ అనే ఈ కమాండ్ లైన్ ప్రోగ్రాం మీకు కావలసిన పాకేజీ ని ఇన్స్టాల్ చేస్తుంది, డిపెండెన్సీలతో సహా ఆటోమాటిగ్గా.
దీని ద్వారా ఇన్స్టాల్ చెయ్యడానికి sudo apt-get install <package-name> అని ఇవ్వాల్సి ఉంటుంది. పాకేజీ ని తీసివేయడానికి sudo apt-get remove <package-name> అని ఇవ్వాల్సుంటుంది. అంతే.
నేనెక్కువగా ఇదే వాడతా. కింద ఒక ఉదాహరణ.

సన్ జావా ఇన్స్టాల్ చెయ్యాలనుకోండి.

మీ కన్సోల్ ఓపెన్ చేసి ఈ కింది విధంగా చెయ్యండి.

sudo vi /etc/apt/sources.list

మీకు ఓ ఫైలు కనిపిస్తుంది, అందులో మల్టీవర్స్ అనే ఒక రిపాజిటరీ ఉంటుంది

#deb http://in.archive.ubuntu.com/ubuntu/ gutsy multiverse
#deb-src http://in.archive.ubuntu.com/ubuntu/ gutsy multiverse

వాటి ముందున్న # లని తొలగించండి.

తరవాత ఈ కింది కమాండ్ లని ఎక్జిక్యూట్ చెయ్యండి.

sudo apt-get update
sudo apt-get install sun-java5-jdk లేదా sudo apt-get install sun-java6-jdk

Adept Manager – ఉబుంటు లో దేనికయినా దాదాపుగా GUI టూల్ ఉంటుందని గుర్తుంచుకోండి అలాగే ఇన్స్టాల్ కి కూడా. ఉదాహరణకి అడెప్ట్ మేనేజర్. మీరు System > Adept Manager కి వెళ్ళండి. దానిని తెరిచి అక్కడ సెర్చ్ లో మీకు కావలసిన పాకేజీ ని ఎంచుకుని Apply Changes అనడమే. ఇన్స్టాల్ అయిపోతుంది.

అలాగే Synaptic Package Manager అని ఇంకో టూల్ కూడా ఉంది. దాని ద్వారా కూడా ఇన్స్టాల్ చేసుకోవచ్చు. అలాగే Add/Remove Programs తో కూడా.

ఇప్పటికే చాలా ఎక్కువయిపోయిందా. ఏదో ఒక మీకు నచ్చిన విధానం ఎంచుకుని సాగిపోండి అంతే.

* ఉబుంటు పాకేజీలన్నీ కావాలనుకుంటే మీరు ఆ డీవీడీ కూడా డౌన్లోడ్ చేసుకోవచ్చు, లేదా ఆన్లైన్ రిపాజిటరీల నుంచి ఇన్స్టాల్ చేసుకోవచ్చు.
* ఉబుంటు లో తెలుగు సరిగా కనిపించకపోయినట్టయితే ఈ లంకెలో ఉన్న సోపానాలని పాటించండి.
* లినక్స్ లో వేర్వేరు డెస్క్‌టాప్ మేనేజర్లున్నాయి. (జీనోం, కేడీయీ, మొదలయినవి…) UI కి కేడీయీ పేరు పొందిన డెస్క్టాప్ మేనేజర్, నాకిష్టమయినది. ఉబుంటు డీఫాల్ట్ గా జీనో తో వస్తుంది, కేడీయీ కావాలనుకుంటే కుబుంటు ఇన్స్టాల్ చేసుకోవచ్చు లేదా మీ కన్సోల్ లో sudo apt-get install kubuntu-desktop అనే కమాండ్ తో కేడీయీ ఇన్స్టాల్ చేసుకోవచ్చు.
* ఉబుంటు లో Alt + Space నొక్కితే అప్లికేషన్ లాంచర్ వస్తుంది. దాని ద్వారా కావలసిన ఏ అప్లికేషన్ నయినా లాంచ్ చేసుకోవచ్చు.

ఏప్రిల్ 22, 2007

లినక్స్/ఉబుంటు డ్యువల్ బూట్ …

Posted in ఉబుంటు, డ్యువల్ బూట్, లినక్స్ వద్ద 8:38 సా. ద్వారా Praveen Garlapati

ఈ కింద నాకు తెలిసున్నంత వరకూ ఎలా చెయ్యాలో చెబుతాను, ఒకట్రెండు లింకులు కూడా ఇస్తాను.

* నేను ఇతరుల దగ్గర నుండి నేర్చుకుందే ఎక్కువ, ట్యుటోరియళ్ళు ఎక్కువ ఉపయోగించలేదు.

డ్యువల్ బూట్ మొదలెట్టే ముందు కొన్ని సూచనలు

1. డాటా ని తప్పక బాకప్ చేసుకోండి.
2. ఉబుంటు ని ఉపయోగించడానికి 2 GB హార్డ్ డిస్క్ స్పేస్, 256 MB రాం అవసరం. దానిని సరి చూసుకోండి.
3. ఉబుంటు మీకు సరిపోతుందో లేదో లైవ్ సీడీ ఉపయోగించి చూసుకోండి.
4. ఒక వేళ కొన్నాళ్ళు వాడి తరవాత ఇన్స్టాల్ చేసుకోవాలనుకుంటే ఉచితంగా లభించే vmware server ఉపయోగించి వాడి చూడండి.

ఇక డ్యువల్ బూట్ విధానం:

1. డ్యువల్ బూట్ కోసం మనకు ముందు మన హార్డ్ డిస్క్ లో సెపరేట్ పార్టీషన్ కావాలి. అంటే మీకు C, D లాంటి డ్రైవులు కనీసం రెండు ఉండాలి. అందులో ఒకటి లినక్స్ కి కేటాయించగలగాలి.

2. లేవు అనుకోండి ఉన్న ఒకే డ్రైవ్ ని మనం ముక్కలు చేసి దానిని మనకు కావలసిన విధంగా పార్టీషన్ చేసుకోవాలి. దానికి ఎన్నో విధానాలు ఉన్నాయి.

అ) ఉబుంటు ఇన్స్టాలర్ ఇప్పుడు లైవ్ సీడీ ద్వారానే సాధ్యం. కాబట్టి మీరు ఆ సీడీ ని మీ సీడీ డ్రైవ్ లో ఉంచి బూట్ చెయ్యండి.
ఆ) ఉబుంటు లోకి బూట్ అయ్యిన తరవాత అక్కడ మెనూ లో పార్టీషన్ చెయ్యడానికి QTParted (under System) అనే యూటిలిటీ ఉంటుంది. దానిని ఉపయోగించి మీ హార్డ్ డిస్క్ ని రీసైజ్ చెయ్యండి. మీకు కావలసినట్టు అందులో సైజ్ నిర్ణయించుకోండి. (ఇది చేసే ముందు విండోస్ లో ఒక సారి మీ డిస్క్ ని డీఫ్రాగ్మెంట్ చేస్తే మంచిది.)

* ఈ QTParted పని చెయ్యకపోతే ఇతర ఏ పార్టీషన్ చెయ్యగలిగే టూల్ నయినా ఉపయోగించి పార్టీషన్ చెయ్యండి. (System Rescue CD, Knoppix, Partition Magic లాంటివి)

3. మీరు ఆ టూల్స్ ని ఉపయోగించి పార్టీషన్ చేసిన తరవాత ఒక సారి సరి చూసుకోండి. (విండోస్ లోకి బూట్ అయి కూడా చూసుకోండి.)

4. అంతా సరిగా ఉందనుకుంటే మళ్ళీ సీడీ నుండి బూట్ చెయ్యండి. మీరు బూట్ చేసిన తరవాత మీకు డెస్క్‌టాప్ మీద ఉబుంటు ఇన్స్టాలర్ అని ఒకటి కనిపిస్తుంది, దానిని తెరవండి. దాంట్లో ఆటోమాతిక్ కాకుండా, మాన్యువల్ అని ఉంటుంది ఆ విధానం సెలెక్ట్ చేసుకోండి డిస్క్ పార్టీషన్ కి.

5. ఇప్పుడు మీరు పార్టీషన్ చేసిన స్పేస్ ని(అదే కొత్తగా సృష్టించిన పార్టీషన్ లో) ఉబుంటు కోసం ఎంపిక చేసుకోండి. మీకు ఒక రూట్ పాటీషన్, ఒక స్వాప్ స్పేస్ కావాలి మినిమం గా. స్వాప్ స్పేస్ కి బండ గుర్తు ఏమిటి అంటే మీ రాం సైజ్ కి రెట్టింపు ఉండాలి. నాకు తెలిసి ఉబుంటు ఆటోమాటిగ్గా దీనిని చేస్తుంది.

6. పైన చెప్పినవే కొద్దిగా కష్టమయిన పనులు. కుదిరితే ఎవరయినా ఇంతకు ముందు చేసిన వారి సహాయం తీసుకోండి. మీకు గనక అల్రెడీ రెండు పార్టీషన్లు ఉండి, ఒక దానిని లినక్స్ కోసం ఉపయోగించగలిగితే అసలు సమస్యే లేదు.

7. ఇక అది సెలెక్ట్ చేసుకున్న తరవాత అంతా straight forward. విండోస్ ఇన్స్టాలర్ మాదిరిగా విజర్డ్ ఉంటుంది, దానిని పట్టి ఆన్సర్ చేస్తూ పోవడమే.

8. మీ సిస్టం లో ఉన్న విండోస్ ని ఇది ఆటోమాతిగ్గ డిటెక్ట్ చేసి మీకు చెబుతుంది, తర్వాత గ్రబ్ ఇన్స్టాల్ చేసి అందులో మీకు విండోస్ ఎక్స్పీ ఆప్షన్ పెడుతింది.

(డ్యూవల్ బూట్ గనక ఇది గ్రబ్ ఇన్స్టాల్ చేస్తుంది. ఇది బూట్‌లోడ్ మేనేజర్. ఇందులో మీకు విండోస్ మరియు, ఉబుంటు ఆప్షన్స్ కనపడతాయి. ఏది సెలెక్ట్ చేసుకుంటే అందులోకి బూట్ అవుతుంది).

మీరు మొదటి సారి చేస్తుంటే గనక ఎవరినయినా సహాయం తీసుకోవడం మంచిది. కానీ మీ పర్సనల్ సిస్టం అయి ఉండి పర్వాలేదు అనుకుంటే సొంతంగా చేస్తే ఎక్కువ విషయాలు తెలుస్తాయి. తప్పు ఆయే ప్రమాదం కూడా ఉంది.

నేను సెర్చ్ చేసిన వాటిలో ఒక రెండు లింకులు పనికొచ్చేవి

http://www.linuxdevcenter.com/pub/a/linux/2006/05/08/dual-boot-laptop.html?page=1
http://ca.geocities.com/zachandloricox@rogers.com/ubuntu/windowsxp.html
http://www.dedoimedo.com/computers/install_kubuntu.html

ఆల్ ద బెస్ట్. 🙂