నవంబర్ 1, 2008

ఉబుంటు ఇంట్రెపిడ్ ఐబెక్స్ ..

Posted in ఇంట్రెపిడ్, ఉబుంటు, టెక్నాలజీ, లినక్సు, linux, ubuntu వద్ద 3:02 సా. ద్వారా Praveen Garlapati

.మొన్న సెప్టెంబరు ౩౦ న ఉబుంటు ఇంకొక సరికొత్త నవీకరణ (8.10) విడుదలయింది. (ఇంట్రెపిడ్ ఐబెక్స్, ఇంకో చిత్రవిచిత్రమయిన పేరు 🙂

* ఉబుంటు మీద ఇంతకు ముందు నా టపాలు ఇక్కడ చూడవచ్చు.

ఇది LTS (Long Term Support) రిలీజు కాదు. కాకపోతే కొన్ని చక్కని మార్పులు చేసారు ఇందులో.

మీరు ఇప్పటికే ఉబుంటు 8.04, హార్డీ హెరాన్ గనక ఉపయోగిస్తున్నట్టయితే ఈ రిలీజుకి నవీకరించడానికి ఈ కింది కమాండుని ఉపయోగించండి.

sudo apt-get dist-upgrade

౧. గ్నోమ్ 2.24: ఉబుంటు ఇంట్రెపిడ్‌లో గ్నోమ్‌ కొత్త నవీకరణ 2.24 ని జతచేసారు.

౨. గెస్ట్ సెషన్: మీరు మీ కంప్యూటరుని వాడుతున్నారు. మీ స్నేహితుడో, మీ ఇంట్లో వాళ్ళో కాసేపు కాసేపు మీ కంప్యూటరుని వాడాలనుకున్నారు. కానీ మీ సిస్టంని వారికి అప్పగించడానికి మీకు ఇష్టముండకపోవచ్చు. మీ ప్రైవేటు ఫైళ్ళు ఎవరయినా చూస్తారేమోనని లేదా ఏదయినా ఫైళ్ళు పొరపాటున తొలగిస్తారని భయముండవచ్చు.
అలాంటి పరిస్థితులలో ఉపయోగించడానికే ఈ కొత్త వర్షనులో గెస్ట్ అకౌంటుని జతచేసారు. మీరు ఎంచగ్గా ఆ అకౌంటుకి స్విచ్ చేసి మీ స్నేహితులకి సిస్టం అప్పగించవచ్చు. ఆ అకౌంటు ద్వారా సిస్టంలో ఏ మార్పులూ చెయ్యలేరు. ఏదయినా చేసినా అవి /tmp ఫోల్డరులోకి వెళతాయి కాబట్టి లాగౌట్ అయిన వెంటనే అన్నీ మాయం.

౩. ప్రైవేటు ఫోల్డరు: మీ సిస్టంలో ఎవరూ చూడదనుకున్న ఫైళ్ళు ఉన్నాయనుకోండి. అది మీ అకౌంటుకి తప్పితే ఎవరూ ఆక్సెస్ చెయ్యకూడదనుకుంటే ఆ సదుపాయం ఈ వర్షనులో ఉంది.
ఈ కింది కమాండులను మీ సిస్టంలో ఇవ్వండి

sudo apt-get install ecryptfs-utils
ecryptfs-setup-private

ఇప్పుడు మీ హోమ్‌ ఫోల్డరు (/home/) లో “ప్రైవేట్ (Private)” అని ఒక ఫోల్డరు కనబడుతుంది. అందులో దాచిన ఏ ఫైలు అయినా ఎన్‌క్రిప్ట్ అయి ఉంటుంది. అది మీ అకౌంటుకి తప్ప ఎవరికీ ఆక్సెస్ అవవు. బాగుంది కదూ ?

౪. యూఎస్‌బీ డిస్క్: ఇప్పుడు మీరు మీ ఉబుంటు ఇన్‌స్టాలేషనుని మీరు ఇప్పుడు మీతో పాటూ ఎక్కడికి కావాలంటే అక్కడికి తీసుకు వెళ్ళవచ్చు. ఇది తయారు చెయ్యడానికి ఒక ఉపకరణం ఇంట్రెపిడ్‌లో జత చేసారు.
కాకపోతే దీనికోసం మీకు ఉబుంటు ఇంట్రెపిడ్ iso కానీ సీడీ కానీ అందుబాటులో ఉండాలి. ఈ ఉపకరణం మీ ఉబుంటుని యూఎస్‌బీ మీదకి కాపీ చేస్తుంది. మీ సెట్టింగులు గట్రా కూడా యూఎస్‌బీ మీదే ఉంటాయి.

౫. నాటిలస్ లో ఇప్పుడు టాబులు: గ్నోమ్‌ నాటిలస్ ఫైలు మేనేజరులో ఇంతకు ముందు వరకూ టాబులు లేవు. ఈ రిలీజులో ఆ ఫీచరు ఉంది.

౬. కేడీయీ 4.1: కేడీయీ వర్షనయిన కుబుంటులో ఈ సారి కేడీయీ 3.5 నుంచి 4.1 కి నవీకరించబడినది. ఇది ఒక పెద్ద మార్పు. ఎందుకంటే కేడీయీ 4 ఇంతకు ముందు కేడీయీ వర్షనులకంటే సమూలంగా మార్పు చెందింది. దాని గురించి నా ఇంతకు ముందు టపా చూడవచ్చు.

ఇవి కాక ఇతర ఉపకరణాలన్నీ నవీకరించబడినవి.

గత కొంత కాలంగా ఇంట్రెపిడ్ ఆల్ఫా వాడుతున్న నా అనుభవాలు:

౧. కేడీయీ 4.1 నాకు అంతగా నచ్చలేదు. సంపూర్ణంగా స్టేబుల్ అయిన పాడక్టు కాదని నా అభిప్రాయం. అవడానికి చక్కని ఐ కాండీ అయిన ఈ వర్షను ఇంతకు ముందు వర్షనయిన కేడీయీ 3.5 అంత స్టేబుల్ గా లేదు.
ఇంకా చెప్పాలంటే గత కొంత కాలంగా నేను కేడీయీ లోకి లాగిన్ అవలేకపోయాను. లాగిన్ అవగానే ఫ్రీజ్ అవుతుంది. కాబట్టి ఇది నాకు పెద్ద ఫ్లాప్. కానీ మిగతా వారికి సరిగానే పని చేస్తున్నట్టుంది.

౨. ఎవల్యూషన్ యొక్క సరికొత్త నవీకరణలో సమస్యలున్నాయి. OWA https యూఆర్‌ఎల్ తో ఇది సరిగా పని చెయ్యదు. కాబట్టి మీ కంపెనీ కనుక మైక్రోసాఫ్ట్ ఎక్స్చేంజ్ వాడుతుంటే మీరు ఐమాప్ ప్రోటోకాలు ఉపయోగించాలి లేదా మీ ఎక్చేంజ్ సర్వరు http ప్రోటోకాల్‌కి మద్దతునివ్వాలి.

౩. ఎక్స్ విండోస్ ఈ రిలీజులో చాలా నిలకడగా ఉంది. డ్యూవల్ మానిటర్ సెటప్ లాంటివి సులభంగా చెయ్యవచ్చు.

౪. నెట్‌వర్క్ మేనేజరు చాలా చక్కగా పని చేస్తుంది ఈ రిలీజులో. మీ ఇంటర్ఫేసులన్నిటినీ ఇది అద్భుతంగా నిర్వహిస్తుంది. వైర్‌లెస్ సమస్యలు దాదాపుగా తీరినట్టే.

చివరగా నా ఇంట్రెపిడ్ గ్నోమ్‌ డెస్కుటాపు చిత్రంతో ముగిస్తాను 🙂

Loading image

Click anywhere to cancel

Image unavailable

సెప్టెంబర్ 3, 2008

గూగుల్ క్రోమ్ – విహరిణుల విపణిలో సరికొత్త ఎంట్రీ …

Posted in క్రోమ్, గూగుల్, టెక్నాలజీ, విహరిణి, సాంకేతికం, technology వద్ద 5:42 సా. ద్వారా Praveen Garlapati

ఇన్నాళ్ళూ ఇంటర్నెట్ ఎక్స్‌ప్లోరర్, ఫైర్‌ఫాక్స్ మధ్య సాగుతున్న విహరిణుల పోటీ నిన్నటితో సరికొత్త మలుపు తిరిగింది.

కొంత మంది ఊహించినట్టు, ఇంకొంత మంది ఊహించనట్టూ గూగుల్ నిన్న క్రోమ్ అనే ఒక సరికొత్త ఓపెన్ సోర్స్ విహరిణిని విడుదల చేసింది.

దీనికి ప్రేరణ గూగుల్ చెబుతున్న ప్రకారం ఒక సరికొత్త విహరిణిని స్క్రాచ్ నుంచి తయారు చెయ్యడం. అంటే దీని డిజైన్, ఆర్కిటెక్చరు అన్నీ కొత్తగా దేని మీదా ఆధారపడకుండా తయారు చెయ్యడం. (ఫైర్‌ఫాక్స్ నెట్‌స్కేపు కోడు బేసు నుంచి తయారయిందని అందరికీ తెలుసనుకుంట)
అలాగే ఇప్పటి విహరిణులలో ఉన్న సమస్యలని అధిగమించడానికీ, ఇప్పటి వెబ్ కి తగినట్టూ తీర్చిదిద్దటం.

ఇక దీంట్లో ప్రత్యేకంగా ఏమున్నాయో చూద్దాము:

౧. లుక్స్ : అన్నిటికన్నా మొదటిగా ఇందులో నేను గమనించింది విహరిణిలో ఎంత ఎక్కువ స్థలం ఉపలబ్ధంగా ఉందో. క్రోమ్ లో టూల్‌బార్ లేదు, స్టేటస్‌బార్ లేదు. ఉన్నదల్లా టాబులు మాత్రమే.
ప్రతీ టాబుకీ విడివిడిగా వాటికి సొంతమయిన యూఆర్‌ఎల్ బారు, పేజీకల బారు ఉంది. దానితో మనకి ఎక్కువ స్క్రీను స్పేసు కనిపిస్తుంది.
అనవసరంగా ఎక్కువ స్థలాన్ని ఉపయోగించకుండా, జాజీగా కాకుండా గూగుల్ స్టైల్లో దీనిని సింపుల్ గా తీర్చిదిద్దారు. అయితే మరీ ప్లెయినుగా ఉండి కొందరికి నచ్చ్కపోవచ్చు కూడా.

. టాబులు: టాబులలో కొత్తేముంది. అన్ని విహరిణులలోనూ ఉన్నాయి. ఐఈ ౭ తో దాంట్లోనూ వచ్చి చేరాయి. ఇక ఓపెరా, ఫైర్‌ఫాక్స్ లలో అయితే మొదటి నుంచీ ఉన్నాయి.
మరి ఇందులో ప్రత్యేకత ఏముంది ?
మీరు వాడే విహరిణులలో మీరు అప్పుడప్పుడూ గమనించి ఉంటారు. ఒక టాబులో చూపించే వెబ్‌పేజీ గనక భారంగా ఉండి స్టక్ అయితే మొత్తం విహరిణినే మూసి మళ్ళీ తెరవాల్సిన పరిస్థితి వస్తుంది. అయితే క్రోమ్‌లో దీనిని కొంత మేరకు మార్చగలిగారు.
ఇందులో మొత్తం విహరిణి ఒక ప్రాసెసుగా కాక, ప్రతీ టాబూ ఒక ప్రాసెసుగా డిజైని చేసారు. అందుకని ఒక టాబులో గనక సమస్య తలెత్తితే దానిని మాత్రమే మూసివేసి మిగతావాటిని అలాగే ఉంచుకోవచ్చు.

. ప్రతీ టాబూ ఒక కొత్త ప్రాసెసు: మొత్తం విహరిణి ఒకే ప్రాసెసుగా కాక ప్రతీ టాబూ ఒక ప్రాసెసుగా చూడడం వల్ల లాభాలున్నట్టే నష్టాలూ ఉండవచ్చు. వాడుకలో నేను గమనించిందేమిటంటే మెమురీ వాడకం ఎక్కువగా ఉంది.
ఉదా: అవే వెబ్‌సైట్లు వివిధ టాబులలో ఫైర్‌ఫాక్స్, ఓపెరా, క్రోమ్, ఐఈ లో తెరిస్తే క్రోమ్ అన్నిటికన్నా ఎక్కువగా మెమొరీ వాడుతుంది నా సిస్టంపైన.
అందుకని డిజైను పరంగా ఇది మంచి నిర్ణయమే అయినా నిజానికి మీ సిస్టముని నెమ్మది చేయవచ్చు.

. జావాస్క్రిప్టు: జావాస్క్రిప్టు మరీ అంత స్ట్రక్చర్డ్ లాంగ్వేజీ కాదు. కాబట్టి దానికి సంబంధించి చాలానే సమస్యలు ఉన్నాయి. అయితే క్రోమ్ లో v8 అనే జావాస్క్రిప్టు ఇంజనుని వాడుతున్నారు. ఇది ఒక VM. జావాస్క్రిప్టుని కంపైల్ చేసి మెషీన్ లాంగ్వేజీలోకి తర్జుమా చెయ్యడంవల్ల వెబ్‌పేజీలు త్వరగా లోడవుతాయని గూగుల్ ఉవాచ.

. వేగం: క్రోమ్‌లో చాలా ఆప్టిమైజేషన్లు చేసామనీ ఇంకా కొత్త జావాస్క్రిప్టు ఇంజిను వాడటం వల్ల పేజీలు వేగవంతంగా లోడవుతాయనీ చెబుతున్నారు. ఇది కొంతవరకూ నిజంలగే ఉంది. నే వాడినంతలో పేజీలు వేగంగానే లోడవుతున్నాయి. దాదాపు ఓపెరాలో అయినంత వేగంగానో, అంతకంటే వేగంగానో లోడవుతున్నాయి.

. అన్నిటికీ ఒకే అడ్రసు బారు: ఫైర్‌ఫాక్స్ ౩ తో మొదలయింది ఆసం పట్టీ. (ఇది మీరు ఇంతకు ముందు వెళ్ళిన వెబ్‌పేజీలనీ, వాటి కంటెంటునీ, మీ పేజీకలనీ అన్నిటినీ కలిపి వెతుకుతుంది) క్రోమ్ ఇవన్నీ చేస్తుంది. అలాగే దానితో పాటు దీనిని గూగుల్ సజెస్ట్‌తో అనుసంధానించారు. కాబట్టి మీరు దేనికోసమయితే వెతుకుతున్నారో దానికి సంబంధించిన సజెషన్లను గూగుల్ సజెస్టు నుంచి అందిస్తుంది.
అలాగే ఇది కొంత తెలివయిన సెర్చ్ ఏర్పాటుని కూడా కలిగుంది. మామూలుగా అయితే మీరు యూఆర్‌ఎల్ బారులో టైపు చేసిన టెక్స్టుని గూగుల్‌లో చెతుకుతుంది. అయితే మీరు ఏదయినా వెబ్‌సైటుకి వెళ్ళి దానికో సెర్చ్ బాక్సు ఉంటే మాత్రం దానిని వాడే ఏర్పాటు ఇందులో ఉంది.

ఎలాగంటే ఉదాహరణకి మీరు cnn.com కి వెళ్ళారనుకోండి. ఆ వెబ్‌సైటులో ఒక సెర్చ్ బాక్సు ఉంటుంది వెతకడానికి. అందుకని మీరు మీ యూఆర్‌ఎల్ బారులో cnn.com అని టైపు చేసి టాబు కొడితే మీరు గూగుల్ కి బదులుగా cnn.com లో సెర్చ్ చెయ్యవచ్చు.

. స్పీడ్ డయల్: ఓపెరాలో స్పీడు డయల్‌లు ఉంటాయి. ఇవేమిటంటే మీరు ఒక కొత్త టాబుని గనక తెరిస్తే మీకు ఒక తొమ్మిది స్పీడు డయళ్ళు కనిపిస్తాయి. దాంట్లో మీరు తరచూ వాడే వెబ్‌సైట్లు సెట్ చేసుకోవచ్చు. కాబట్టి కొత్త టాబు తెరవగానే సమయం వృధా కాకుండా వాటిని నొక్కితే వెంటనే ఆయా సైట్లకి వెళ్ళిపోవచ్చు.
ఇలాంటిదే క్రోమ్‌లో కూడా ఉంది. అయితే ఇందులో స్పీడు డయళ్ళు ఆటోమేటిగ్గా మీరు తరచూ వెళ్ళే వెబ్‌సైట్లుగా సెట్ చెయ్యబడి ఉంటాయి. మీరు సెట్ చేసుకోలేరు. మీరు ఇంతకు ముందు బ్రౌజ్ చేసిన చరిత్రని బట్టి వీటి ఎంపిక ఉంటుంది.

. ప్రైవేటు బ్రౌజింగు: కొన్ని సార్లు మీరు వెళ్ళిన వెబ్‌సైట్ల వివరాలు బ్రౌజరులో నిక్షిప్తం కాకుండా ఉండాలని మీరు కోరుకోవచ్చు. (ఉదా: పోర్న్ కోసం చూసేవారు) ఎందుకంటే మీ ఆసం పట్టీలో లేదా స్పీడు డయళ్ళలో ఆయా సైట్లు కనిపిస్తే మీకు ఇబ్బంది కలగవచ్చు. సాధారణంగా అయితే మీరు మీ విహరిణి కాష్ (cache) ని తుడిచివెయ్యడమో లేదా చరిత్రని తుడిచివెయ్యడమో చేస్తుంటారు. అయితే దానివల్ల మిగతా చరిత్ర వివరాలన్నీ కూడా తుడుచుకుపోతాయి.
అలా కాకుండా మీరు ప్రస్తుతం బ్రౌజ్ చేస్తున్న టాబుని మాత్రమే విహరిణి చరిత్రలో రాకుండా “Incognito” అనే ఒక కొత్త మోడ్‌ని క్రోమ్ లో ప్రవేశపెట్టారు. మీ దానిని ఎంపిక చేసుకుంటే ప్రైవేటుగా బ్రౌజ్ చెయ్యవచ్చన్నమాట.

. సెక్యూరిటీ: ఇతర విహరిణులలో ఉన్నట్టే ఇందులోనూ సెక్యూరిటీ బాగుంది. మీరు “ఫిషింగ్” లేదా స్పైవేరు ఉన్న వెబ్‌సైట్లకి వెళితే క్రోమ్ మిమ్మల్ని హెచ్చరిస్తుంది.
అలాగే సర్టిఫికెట్లు ఎక్స్పైర్ అయిన లేదా సరిపోలని వెబ్‌సైట్లకి వెళ్ళినా ఇది మిమ్మల్ని హెచ్చరిస్తుంది.

౧౦. దిగుమతులూ, అప్లికేషన్లూ: ఇక క్రోమ్ లో దిగుమతులూ సులభమే. ప్రస్తుతం అవుతున్న దిగుమతిని “పాజ్” చేసి మళ్ళీ తర్వాత అక్కడ నుంచి కానివ్వచ్చు. అలాగే దీనికి స్టేటస్ బార్ ఉండదు కానీ దిగుమతి అవుతున్న ఫైలుని అవుతున్నంత సేపూ ఆ స్థలంలో చూపిస్తుంది. పూర్తయిన తర్వాత ఆ ఫైలుని మీకు కావలసిన ప్రదేశానికి మార్చుకోవచ్చు.
అలాగే ఫైర్‌ఫాక్స్ “ప్రిజ్మ్” లాగా దీనినుంచి ఒక్క టాబు మాత్రమే ఉండే అప్లికేషన్లూ కూడా సృష్టించుకోవచ్చు.

౧౧. తెలుగు: క్రోమ్‌లో తెలుగుకి మద్దతు ఉంది. మీ విహరిణి ప్రధానమయిన భాషగా తెలుగుని పెట్టుకోవచ్చు. అలాగే తెలుగు యూనీకోడుని బాగానే చూపిస్తుంది. అయితే బరహ, అక్షరమాల వంటి ఉపకరణాలు ఇందులో సరిగా పని చెయ్యట్లేదు. అలాగే అక్కడక్కడా “Unjustified text” సమస్య చూసాను నేను.
ఇంకా పద్మ, indic input extension లాంటి జోడింపులు ఇందులో వాడలేము.
చిత్రంగా ఈనాడు డైనమిక్ ఖతిని ఇది బానే చూపిస్తుంది. ఆంధ్రజ్యోతిని సరిగా చూపించట్లేదు.

పైనవి స్థూలంగా ఇందులో విశేషాలు. ఇన్నొవేషను పరంగా ఫీచర్లను చూస్తే పెద్దగా కొత్తేమీ లేదు. (ఉంటే డిజైను పరంగా ఉండవచ్చు). ప్రస్తుతం ఉన్న ఇతర విహరిణులలో నుంచి మంచి ఫీచర్లన్నిటినీ ఒక దగ్గర పోగు మాత్రం చేసారు.

అయితే సరికొత్త విహరిణి తయారు చెయ్యవలసిన అవసరం గూగుల్ కి ఏముందని ప్రశ్నిస్తే దీనికి వేరే కారణాలు ఎక్కువుండచ్చనిపిస్తుంది. ముందు ముందు గూగుల్ అప్లికేషన్లని ప్రమోట్ చేసుకునేందుకు వీలుగా దీనిని తయారు చెయ్యవచ్చు లేదా మీ బ్రౌజింగు డాటాని మాకందిస్తే మీకు తగినట్టు మీరు విహరిస్తున్నప్పుడు మీకు కావలసినట్టు అంతర్జాలాన్ని కస్టమైజు చేస్తామని చెప్పవచ్చు. అలాగే మొబైలు మీద ఈ విహరిణిని ప్రస్తుతం ఉన్న ఓపెరా మినీ, ఐఈ లకి ప్రత్యామ్నాయంగా ఉంచవచ్చు.

ప్రస్తుతానికయితే ఇది ఇంకో విహరిణి మాత్రమే. ఇంకా చెప్పాలంటే ఫైర్‌ఫాక్స్ కంటే తక్కువలో ఉంది ఇది. ఎందుకంటే దీంట్లో జోడింపుల సౌకర్యం లేదు. ఫైర్‌ఫాక్స్ బలమంతా అందులోనే ఉంది. కాబట్టి అలాంటిదేదో గూగుల్ చెయ్యాల్సిందే.
నాకయితే ఏదో బ్రౌజ్ చేసుకోడానికి బాగానే ఉన్నా ప్రస్తుతానికి ఫైర్‌ఫాక్స్ ఇచ్చిన సౌకర్యం ఇది ఇవ్వట్లేదని అనిపిస్తుంది. కానీ గూగుల్ కున్న హైపుని బట్టి దీనికి మంచి మార్కెటే ఉండవచ్చు.
అలాగే మొత్తం స్క్రాచు నుంచి తయారు చేసామని చెబుతున్నా ఆపిల్ వారి వెబ్‌కిట్, మోజిల్లా ఫైర్‌ఫాక్స్ నుంచి కోడుని వీరు వాడారు. కాబట్టి అందులో ఏమన్నా సమస్యలుంటే అవి వీటిలోకీ రావచ్చు.

ఏదయితే ఏమిటి. మనకి దీని దయవల్ల ఇంకొక మంచి విహరిణి వస్తే సంతోషమే…

ఆగస్ట్ 30, 2008

Ubiquity – ఒక విభిన్నమయిన మంటనక్క జోడింపు …

Posted in టెక్నాలజీ, మంటనక్క, సాంకేతికం, firefox, technology, Ubiquity వద్ద 7:38 సా. ద్వారా Praveen Garlapati

మంటనక్క అద్భుతాలు మనకి తెలియనివి కాదు. ఒక విహరిణిగా ఎంత చక్కగా పనిచేస్తుందో అసలు చెప్పనక్కర్లేదు.

అన్నిటికన్నా ఇందులో మిన్న దీని జోడింపులు (Addons). ఇది ఇంతకు ముందు కూడా చెప్పాను… కొత్తగా మంటనక్క వారు ఒక జోడింపును విడుదల చేసారు. Ubiquity అని.
మనం అంతర్జాలం విహరించే పద్ధతిని ఇది సమూలంగా మార్చేస్తుందని నాకనిపిస్తుంది. అద్భుతంగా డిజైను చేసారు దీనిని.

ఉదా: మీరు ఒక ఈ మెయిలు పంపుతున్నారు స్నేహితుడికి మనం రేపు ఫలానా ప్రదేశంలో కలుద్దామని. దానికి జతగా ఒక మాపు పంపుదామనుకున్నారనుకోండి. ప్రస్తుతం జరిగే తంతు ఇది:

౧. ఒక కొత్త టాబుని లేదా విండోని తెరుస్తాము
౨. అందులో http://maps.google.com కి వెళతాము
౩. అక్కడ మనకు కావలసిన ప్రదేశాలు, ఎక్కడ నుంచి ఎక్కడకి వెళ్ళాలో వెతుకుతాము
౪. తర్వాత అందులో నుంచి మాపుని ఎంబెడ్ చేయాల్సిన కోడుని తీసుకువచ్చి మన మెయిల్లో పెట్టడమో లేదా దానికి లంకె వేయడమో చేస్తాము

మరి దీనిని కొత్త టాబు/విండో తెరవకుండా సులువుగా చేయగలిగితే ? అద్భుతంగా ఉండదూ….

పైన చెప్పిన దాన్ని ఈ Ubiquity జోడింపుతో ఎలా చెయ్యచ్చంటే

౧. విండోసులో అయితే Ctrl + space నొక్కడం
౨. Ubiquity లో “map ” టైపు చెయ్యడం. ఉదా: map hyderabad అని టైపు చెయ్యండి
౩. దాంట్లోనే ఉన్న insert లంకెని ఉపయోగించి మాపుని మీకు కావలసిన చోట ఎంబెడ్ చెయ్యడమే

సింపుల్ గా లేదూ ?

ఇంకో ఉదాహరణ చూద్దాము

మీరు ఒక పదం చూసారు. దానికి అర్థం కావాలనుకోండి ఏ “dictionary.com” కో వెళ్ళి ఆ పదాన్ని టైపు చేసి వెతకాలి.
అలాగే దేని గురించయినా సమాచారం కావాలంటే వికీకి వెళ్ళి ఆ పదాన్ని శోధించాలి.

ఇవన్నీ ఇంకో వెబ్ పేజీ తెరవకుండానే చేయగలిగితే ?

define అని Ubiquityలో టైపు చేస్తే దాని అర్థం మీకు అక్కడికక్కడే చూపిస్తుంది.
ఉదా: define tecnology

wiki అని Ubiquityలో టైపు చేస్తే ఆ పేజీ ప్రివ్యూని అక్కడికక్కడే చూడవచ్చు.
ఉదా: wiki animation

ఇలాంటివింకెన్నో Ubiquity తో సాధ్యం.

ప్రస్తుతం ఉన్న ఫీచర్లే కాకుండా అదనంగా ఫీచర్లని జోడించడం కూడా చాలా సులువు. వెబ్‌ మాషప్ లని చాలా సులభంగా చెయ్యవచ్చు.

ఉదా: మీరు వెబ్ పేజీలో ఒక పదాన్ని బ్రౌణ్యం లో వెతకాలనుకున్నారనుకోండి. దానికి షార్టుకట్ ఇందులో ఏర్పాటు చేసుకోవచ్చు.

chrome://ubiquity/content/editor.html అనే లంకెని మీ url bar లో టైపు చెయ్యండి.

అక్కడ వచ్చిన ఎడిటరులో ఈ కింది కోడుని ఉంచండి. అంతే

makeSearchCommand({
name: “telugu”,
url: “http://dsal.uchicago.edu/cgi-bin/romadict.pl?query={QUERY}&display=utf8&table=brown”,
icon: “http://dsal.uchicago.edu/favicon.ico”,
description: “Search for telugu words.”
});

ఇప్పుడు మీరు Ctrl + space నొక్కి telugu టైపు చేసారనుకోండి అదెళ్ళి బ్రౌణ్యంలో వెతుకుతుంది. అలాగే telugu this అని టైపు చేస్తే మీ వెబ్ పేజీలో హైలైట్ చేసిన పదాన్ని బ్రౌణ్యంలో వెతుకుతుంది.

అలాగే తెవికీలో ఏదయినా పదం వెతకాలనుకోండి.

makeSearchCommand({
name: “tewiki”,
url: “http://te.wikipedia.org/wiki/{QUERY}”,
icon: “http://te.wikipedia.org/favicon.ico”,
description: “Search తెవికి.”
});

భలేగా లేదూ…

అలాగే ఒక పేజీ మీద మీరు ఎంచుకున్న టెక్స్టుని తెలుగు యూనీకోడు నుంచి ఆర్టీఎస్ కి మార్చుకునేలా లేదా ఆటీఎస్ నుంచి తెలుగులోకి మార్చుకునేలా కూడా రాసుకోవచ్చు. లేదా మీరు ఎంచుకున్న ఆంగ్ల టెక్స్టుని ఆటోమేటిగ్గా తెలుగులోకి మార్చుకునేలా ఏర్పరచుకోవచ్చు.

దీనికే సంబరపడిపోతే ఎలా ? ఇది దీనికున్న సామర్థ్యంలో వెయ్యో వంతు మాత్రమే…
మంటనక్క స్టయిల్లో దీనిని ఎక్స్టెండబుల్ గా తీర్చిదిద్దినందున దీంతో లెక్కలేనన్ని పనులు చేయించవచ్చు.

వికీలో, గూగుల్లో, మరే ఇతర శోధన యంత్రంలో నయినా వెతకవచ్చు. వికీలో నుంచి ఒక వ్యాసాన్ని ప్రివ్యూ చూడవచ్చు. ఒక పదం యొక్క అర్థం వెతకొచ్చు, మీ కాలెండరుకి ఒక కొత్త టాస్కుని జోడించుకోవచ్చు, ట్విట్టర్ లో ట్వీట్ చెయ్యచ్చు, ఒక పెద్ద లంకెకి టైనీ యూఆరెల్ ని సృష్టించవచ్చు, ఒకటనేంటి ఏ పనినయినా చేయించవచ్చు.

ఒక రకంగా చెప్పాలంటే అన్ని జోడింపులనూ కలిపే ఒకే పెద్ద జోడింపుగా దీనిని చూడవచ్చు. కాకపోతే ఇందులో మనం కొత్తగా ఏదయినా జోడించాలనుకుంటే మీ విహరిణిని మూసి తెరవాల్సిన అవసరం లేదు. మీ స్క్రిప్టుని Ubiquity ఎడిటరులో పెట్టగానే వాడేసుకోవచ్చు.

దీనిని డెస్కుటాపు ఉపకరణాలతో పోల్చాలంటే లాంచీతో కానీ, కాటాపల్ట్‌తో కానీ, క్విక్ సిల్వర్‌తో కానీ పోల్చవచ్చు. కాకపోతే అవి మీ కంప్యూటరు కోసం, ఇది మీ అంతర్జాలం కోసం.

Ubiquity గురించి మరింత తెలుసుకోవాలంటే ఇది చదవండి. ఈ కింది వీడియో చూడండి.

Ubiquity for Firefox from Aza Raskin on Vimeo.

మరి మీరు దీనిని ఉపయోగించి ఏం చెయ్యబోతున్నారో ?

ఆగస్ట్ 6, 2008

విండోసు ఉపకరణాలకి లినక్సు ప్రత్యామ్నాయాలు …

Posted in ఉపకరణాలు, కేడీయీ, గ్నోమ్‌, టెక్నాలజీ, ప్రత్యామ్నాయాలు, లినక్సు, సాంకేతికం వద్ద 6:50 సా. ద్వారా Praveen Garlapati

లినక్సు గురించీ, ఉబుంటు గురించీ నా ఇంతకు ముందు టపాలలో కొన్ని సార్లు చెప్పాను.

ఎంత కాదనుకున్నా ఒప్పుకోవాల్సిన విషయమేమిటంటే విండోసు, మాక్ లాంటి కమర్షియల్ ఆపరేటింగు సిస్టమ్‌ లనే జనాలు ఎక్కువగా వాడతారు.

జనాలు ఎందుకు లినక్సు ఉపయోగించరు అని ప్రశ్నించుకుంటే మామూలుగా వచ్చే సమాధానాలు చాలా వరకూ అపోహలనే అనిపిస్తుంది. ఒకప్పుడు వాడుకరులకి అనుకూలంగా కాక గీకులు మాత్రమే ఉపయోగించే విధంగా లినక్సు ఉండేది. అది నిజం.
ఏ పని చెయ్యాలన్నా కమాండు లైను నుంచి చెయ్యాల్సి వచ్చేది. ఆ తరువాత దానికి జోడింపులు వచ్చి ఎక్స్ విండో సిస్టం వచ్చినా ఆ ముద్ర మాత్రం వదలలేదు.

అందుకని జనాలకు మామూలుగా ఉండే కొన్ని అపోహలను దూరం చేసి, లినక్సులో రోజువారీగా వాడుకోడానికి కావలసిన ఉపకరణాలు కొన్నింటి గురించి ఇక్కడ చెప్పటానికి ప్రయత్నిస్తాను.

౧. చూడడానికి బాగుండాలి:

విండోసు వాడిన వారందరికీ ముఖ్యంగా నచ్చే విషయం అది చూడడానికి బాగుంటుంది. కంటికింపుగా ఉంటుంది. నాకయితే “విండోస్ ఎక్స్పీ” ముందు వరకూ విండోసు నచ్చేది కాదు. ఎక్స్పీ మాత్రం నన్ను చూపులతో ఆకట్టుకుంది. విస్టా ఏరో ఎఫెక్టులతో దానిని ఇంకో ముందంజ ?? వేయించినా దానిని ఉపయోగించాలంటే ఒక జీబీ పైన రామ్‌ అవసరమవుతుంది.

మరి లినక్సు చూడడానికి బాగుంటుందా ?

దీనికి సమాధానం ఒక్క మాటలో చెప్పాలంటే కుదరదు. ఎందుకంటే ఇది అభిరుచికి సంబంధించినది. (నాకు విస్టా కంటే ఎక్స్పీ నే బాగుందనిపించింది.)
కాకపోతే ఇక్కడ కొంత వివరిస్తాను. కొన్ని తెర పట్టులు చూపిస్తాను. మీరే నిర్ణయించుకోవచ్చు.

స్థూలంగా చూస్తే లినక్సులో ఉండే ముఖ్యమయిన విండో సిస్టములు రెండు. గ్నోమ్‌, కేడీయీ (ఇంకా ఎన్నో ఉన్నాయి. కానీ ఎక్కువ మంది వాడేది ఇవే). సింపుల్ గా, పని చేసే వ్యవస్థ కావాలనుకునే వారు గ్నోమ్‌ వాడతారు. మంచి చాక్లెటీ లుక్సూ, చూడడానికి బాగుండాలి అనుకునే వారు కేడీయీ వాడతారు.

గ్నోమ్‌ (ఉబుంటు మీద)

కేడీయీ (కుబుంటు మీద)

నా మటుకు నేను ఎక్కువగా కేడీయీ వాడతాను. (మీరూహించినందుకు కాదు 😉 )

ఇంకో విషయమేమిటంటే లినక్సుని మనం అద్భుతంగా కస్టమైజు చేసుకోవచ్చు.

ఉదా: గ్నోమ్‌ ని మాక్ లాగా ఇలా మార్చుకున్నాను నేను.

వీటన్నిటికీ మించి కాంపిజ్ ఎఫెక్ట్లు చేతనం చేసిన ఈ తెరపట్టులు చూడండి.

మీకు ఇంకా లినక్సు చూడడానికి బాగుండదనే అనిపిస్తుందా ???

౨. ఆఫీసు ఉపకరణాలు:

లినక్సుకి మారాలనుకున్న వారికి ఇంకో పెద్ద సమస్య ఆఫీసు ఉపకరణాలు. అంటే వర్డు, ఎక్సెలు, పవర్‌పాయింటు లాంటివి.

దీనికి లినక్సు ప్రత్యామ్నాయం “ఓపెన్ ఆఫీస్“.






మొత్తం కావలసిన ఉపకరణాలు అన్నీ ఇందులో ఉంటాయి. వర్డు ప్రాసెసరు, స్ప్రెడ్ షీట్, ప్రెజెంటేషను వగయిరా అన్నీను.
ఇంకొక విషయమేమిటంటే మైక్రోసాఫ్టు ఆఫీసు అన్ని అప్లికేషన్లతోనూ ఇది కంపాటిబుల్. అంటే మీ .doc, .xls, .ppt వంటి వాటినన్నిటినీ ఓపెన్ ఆఫీసులో తెరవవచ్చు, మార్చవచ్చు, కొత్తవి సృష్టించవచ్చు.

౩. మెయిలు

మామూలుగా జనాలు తమ కార్పొరేట్లలో “మైక్రోసాఫ్టు ఎక్స్చేంజు” వాడతారు. దానికి క్లయింటుగా “అవుట్‌లుక్” వాడతారు. ఎందుకంటే వారు ప్రొప్రయిటరీ ప్రోటోకాల్ వాడతారు.

దానికి లినక్సులో ప్రత్యామ్నాయం “ఎవల్యూషన్“.

ఇది అన్ని రకాల ప్రోటోకాల్స్ తో (పాప్, ఐమాప్ వగయిరా…) పాటు “ఎక్స్చేంజు” ప్రోటోకాల్ ని కూడా సపోర్టు చేస్తుంది. దీనితో మీ కాలెండరు కూడా పని చేస్తుంది. మీటింగులు గట్రా అన్నీ దీని ద్వారా పని చేస్తాయి.

అలాగే మీకు తెలిసిన “థండర్‌బర్డ్” ఎలాగూ ఉండనే ఉంది.

౪. మల్టీమీడియా:

నాకయితే పని చేస్తున్నంత సేపూ పాటలు చెవిలో మోగాల్సిందే. అలాంటప్పుడు మంచి సంగీతం పాడే ప్లేయరు చాలా అవసరం.
అలాగే రోజూ ఒక సినిమా చూడాల్సిందే. అందుకని అన్ని రకాల ఫార్మాట్ల సినిమాలనూ చక్కగా ప్లే చేసే ప్లేయరు కూడా చాలా అవసరం.

విండోసులో అయితే విన్ ఆంప్, విండోసు మీడియా ప్లేయరు, వీఎల్సీ లాంటివి ఉంటాయి. మరి వాటికి లినక్సు ప్రత్యామ్నాయాలో ?

పాటలకి “అమరాక్” అనే ఒక అద్భుతమయిన ప్లేయరు ఉంది. ఇది ఆల్ ఇన్ వన్ ప్లేయరు. దాదాపు అన్ని రకాల ఫార్మాట్లనూ ప్లే చేస్తుంది. నాకయితే ఇది లేనిదే రోజు గడవదు. (ఇది పాటలు పాడుతుంది. స్ట్రీమ్‌ లను అర్థం చేసుకుంటుంది. ఐపాడ్, సాన్‌డిస్క్ లాంటి మీ మ్యూజిక్ ప్లేయర్లను గుర్తించగలుగుతుంది. వాటిని సింక్ చేయగలుగుతుంది.)

ఇంకా రిథమ్‌ బాక్స్, టోటెమ్‌, కెఫీన్ లాంటి ఎన్నో ప్లేయర్లు ఉపలబ్ధం.

అలాగే సినిమాలు ప్లే చెయ్యడానికి నాకు అన్నిటికన్నా నచ్చేది “క్సైన్“. ఇది ఒక అద్భుతమయిన ప్లేయరు. దాదాపు అన్ని రకాల ఫార్మాట్లనూ ప్లే చేస్తుంది. చక్కని క్వాలిటీ చిత్రం అందిస్తుంది. ఇంకో సంగతేమిటంటే‌ మనకెంతో ఇష్టమయిన వీఎల్సీ ప్లేయరు లినక్సులో కూడా లభ్యం.

౫. ఇంటర్నెట్ మెసెంజరు:

విండోసులో మనం ఎక్కువగా యాహూ మెసెంజరు, గూగుల్ టాక్, ఎమెసెన్ మెసెంజరు వాడతాము. వాటన్నిటికీ ఒక్కో మెసెంజరు తెరిచి ఉంచాలి, లేదా “పిడ్జిన్” లాంటి ఓపెన్ సోర్స్ క్లయింటు వాడి అన్నిటికీ అనుసంధానం కావచ్చు.

పిడ్జిన్ మొదటగా లినక్సు కోసం రూపొందించిందే. అద్భుతమయిన క్లయింటు ఇది. యాహూ, గూగుల్ టాక్, ఏఓఎల్, ఎమెసెన్, జాబర్ వంటి ఎన్నో ప్రోటోకాల్స్ ని ఇది సమర్థిస్తుంది.

ఇంకా “కోపీటె” లాంటి ఇతర క్లయింటులు కూడా ఉన్నాయి.

౬. ఇమేజింగు:

ఎక్కువగా విండోసు మీద జనాలు ఫోటోలకీ, వాటితో పని చేయ్యడానికీ ఫోటోషాపు, పెయింట్.నెట్, కోరెల్ డ్రా లాంటివి వాడతారు.

దానికి లినక్సులో ప్రత్యామ్నాయాలు గింప్, ఇంక్‌స్కేప్ వాడవచ్చు.

౭. విహరిణి:

లినక్సు మీద ఎన్నో విహరిణులు లభ్యం. మన మంట నక్క లినక్సు మీద ఉంది. అలాగే ఓపెరా, కాంక్వరర్, లింక్స్ లాంటి ఎన్నో విహరిణులు లినక్సు మీద లభ్యం.

తెలుగులో రాయడం:

తెలుగులో రాయడానికి విండోసులో బరహ, అక్షరమాల లేదా ఇన్‌స్క్రిప్టు వాడతాము.

దానికి బదులుగా లినక్సులో స్కిమ్‌ లేదా మన భాష కీబోర్డు వాడవచ్చు.

ఇవన్నీ మనం రోజువారీ ఉపయోగించే ఉపకరణాలు. ఇవి కాక మనకు కావలసిన పనులన్నిటికీ ఉపకరణాలు లినక్సులో లభ్యం.

మీకు ఇంకో వార్త. ఇప్పటి వరకూ లినక్సులో మాత్రమే లభ్యమయిన కేడీయీని ఇక పైన విండోసు మీద కూడా పరిగెత్తించవచ్చు. QT అనే క్రాస్ ప్లాట్ఫాం మీద రూపొందించడం వల్ల కేడీయీని తేలికగా విండోసు మీదకి కూడా పోర్టు చెయ్యడం కుదురుతుంది. ఇప్పటికే దీని బీటా వర్షన్లు కూడా లభ్యం. అంటే ఇక పైన మీకు ఇష్టమయిన “అమరాక్” లాంటి ఉపకరణాలు విండోసు మీద కూడా లభ్యమవుతాయి అన్నమాట.

మరి ఇంత పరిపూర్ణమయిన ఆపరేటింగ్ సిస్టం ని వాడకుండా ఎలా ఉండగలరు ? 🙂

ఇది చూడండి: ఈ వ్యాసంలో ఉపయోగించిన చిత్రాలు అన్నీ నావి కావు. కొన్ని ఆయా సైట్ల నుంచి తీసుకోవడం జరిగింది. వాటిపై హక్కులన్నీ వారివే.

జూలై 28, 2008

మైక్రోబ్లాగింగు… – కుచించుకుపోతున్న సమాచారం

Posted in టెక్నాలజీ, ట్విట్టర్, ఫ్రెండ్‌ఫీడ్, మైక్రోబ్లాగింగు, సాంకేతికం వద్ద 6:18 సా. ద్వారా Praveen Garlapati

అసలు మన సంభాషణలు రానురానూ ఎంత కుచించుకుపోతున్నాయో అనిపిస్తుంది నాకు…

ముఖాముఖి మాట్లాడుకునే రోజులనుండి మెల్లగా ఉత్తరాలు, ఫోనులు, ఈమెయిళ్ళూ, ఎసెమెస్సులు.
ఈ ట్రెండుని చూస్తే మీకనిపించట్లేదూ రాను రానూ మాటలు తక్కువయిపోతున్నట్టు.

అన్నట్టు ఈ పద్ధతి కేవలం మన మాటలకే కాదు, అన్ని రకాల సాధనాలకీ వర్తించడం మొదలయింది.
భాష కూడా స్పష్టంగా చెప్పగలిగే పదాల నుంచి పొడి పొడి మాటల వైపు సాగుతుంది అనిపిస్తుంది.

ఉదా: “Can I see you tomorrow ?” ఈ వాక్యం రాయాలనుకోండి ఇప్పట్లో అయితే జనాలు ఇలా రాస్తున్నారు “cn i c u tmrw ?”

అసలు మరీ ఇంత పొదుపేంటో ??
కొన్ని సార్లయితే నాకు తెలిసిన డీక్రిప్షన్ టెక్నిక్కులు కూడా ఉపయోగించి మరీ చదువుకోవాల్సి ఉంటుంది.
(ఇంకొన్ని సార్లు గూగుల్ లో వెతకాల్సి ఉంటుంది)

ఇవన్నీ ఎందుకు చెబుతున్నానంటే బ్లాగులు రాయడం నుంచి ప్రపంచం ఇప్పుడు “మైక్రోబ్లాగింగ్” వైపు సాగుతుంది. (కవితల నుండి హైకూల వైపు సాగినట్టు).

మన తెలుగు లోకంలో బ్లాగులంటే కొత్త మోజులో బాగున్నాయి గానీ ఆంగ్లంలో బ్లాగులు ఇప్పటికే “ఫాటిగ్” వైపు సాగుతున్నాయి. ఇప్పటి వరకూ (ఇంకా రాస్తున్నారు అనుకోండి) ఎంతో ఓపికతో రాసిన వారు ఇప్పుడు ఓపిక లేక కొత్త ట్రెండుని మొదలుపెట్టారు. అదే మైక్రోబ్లాగింగ్.

ఇందులో ప్రత్యేకత ఏమిటంటారా ? లైన్ల కొద్దీ, పేజీల కొద్దీ రాయక్కర్లేకుండా కేవలం కొద్ది మాత్రం పదాలతోనే మనం చెప్పాలనుకున్నది చెప్పడం అన్నమాట.

ఈ పద్ధతిని బాగా ప్రాచుర్యం లోకి తెచ్చింది ట్విట్టర్. దీని గురించి ఒక మైక్రో బ్లాగు లాగా ఊహించుకోండి. కాకపోతే ఇందులో మీరు నూట నలభై పదాలకన్నా ఎక్కువ రాయలేరు. అంటే మీరనుకున్నదాన్ని సరిగా చెప్పడానికి క్రియేటివిటీ ఉపయోగించాలన్నమాట.

ఈ అప్లికేషను రాత్రికి రాత్రే పెద్ద హిట్టయిపోయింది. జనాలు విపరీతంగా ఉపయోగించడం మొదలుపెట్టారు. ఇందులో నిమిష నిమిషానికీ ఏం చేస్తున్నారో రాసేసే వాళ్ళూ ఉన్నారు, తమకు తెలిసిన లంకెలను ఇతరులతో పంచుకునే వాళ్ళూ ఉన్నారు, తమ ఉత్పత్తులకి ప్రచారం చేసుకునే వాళ్ళున్నారు, తమ బ్లాగు టపాలకి ఇందులో లంకెలిచ్చి హిట్లు పెంచుకునే ప్రబుద్దులూ ఉన్నారు.

వైవిధ్య భరితమయిన అవసరాలకు ఇప్పుడు దీనిని జనాలు వాడడం జరుగుతుంది. ప్రెసిడెన్షియల్ కాంపెయిన్ కి ఆఖరికి ఒబామా, హిల్లరీలు కూడా దీనిని వాడారు.

అలాగే ఎన్నో కంపెనీలు తమ ఉత్పత్తుల విడుదలలు, వాటి మీద తగ్గింపులు గట్రా ట్విట్టర్ ద్వారా ప్రచారం చేసుకుంటున్నాయి. ఉదా: డెల్ అవుట్‌లెట్.

ఇక ట్విట్టర్ బాగా ప్రాచుర్యం పొందడంతో దానికి ప్రత్యామ్నాయంగా ఇంకొన్ని సర్వీసులూ మొదలయ్యాయి.

జైకూ (దీనిని ఇప్పుడు గూగుల్ అక్వైర్ చేసింది)

టంబ్లర్ (ఇది ఇంకో రకమయిన మైక్రోబ్లాగింగ్ లంకెలు, ఫోటోలూ, చిన్న చిన్న మెసేజీలు అంటే మల్టీమీడియాతో సహా అన్నమాట.), పౌన్స్ మొదలయినవి… దాదాపు ఇలాంటి వంద సైట్లు ఇప్పటి వరకూ మొదలయ్యాయని ఒక అంచనా.

అసలు ఇవి ఎంతగా ప్రాచుర్యం పొందాయి అంటే వీటి కోసం, వీటి మీద ఆధారపడి ఇంకొన్ని స్టార్టప్పులే తయారయ్యాయి.

ఉదా: ట్విట్టర్‌లో ట్వీట్ లను వెతకడం కోసం సమ్మైజ్ అనే ఒక స్టార్టప్ మొదలయింది (ఇప్పుడు ట్విట్టర్ దీనిని కొనేసిందనుకోండి). అలాగే దీంట్లో రాయడం కోసం ప్రత్యేకంగా ఎన్నో క్లైంటులను తయారు చేసారు. మంటనక్క జోడింపుగా, అడోబ్ ఎయిర్ ఆప్ గా, కేడీయీ విడ్జెట్టుగా, చెప్పలేనన్ని క్లయింటులు దీని కోసం రాయబడ్డాయి.

ఈ ధాటిని తట్టుకోలేక ట్విట్టర్ ఇప్పుడు స్కేలబులిటీ సమస్యలని కూడా ఎదురుకుంటోంది.

ఈ కాన్సెప్టు ఇంతగా హిట్టయితే ఇక దీనిని వేరే వాటికి ఆపాదించకుండా ఉంటారా ? వెంటనే ఇలాంటివే అప్లికేషన్లు తెగ మొదలయినియ్యి.

ఈ మధ్యే 12seconds.tv అనే కొత్త సైటు ప్రారంభమయింది. ఇది కూడా ట్విట్టర్ లానే కానీ వీడియో కోసం. పన్నెండు సెకెండ్లలో మీరు రికార్డు చెయ్యాలనుకున్నది చేసెయ్యాలి. (ఇంతకు ముందే ఫ్లికర్ లో కూడా తొంభై సెకండ్లు మాత్రమే కనిపించగలిగే వీడియో మొదలుపెట్టారు)

అలాగే ఇదే కాన్సెప్టు మీద ఫ్రెండ్‌ఫీడ్ అనే సైటు కూడా మొదలయింది. ఇది మీ పర్సనల్ అగ్రిగేటర్ అన్నమాట. మీ అన్ని అకౌంట్లలో నుంచీ మీరు ఎప్పుడే తాజీకరణ చేసినా వెంటనే ఇది పట్టేస్తుంది. అన్నిటినీ ఒక దగ్గర చూపిస్తుంది. గూగుల్ లో ఇంతకు ముందు పని చేసే వాళ్ళచే మొదలుపెట్టబడిన కంపెనీ ఇది. ఈ మధ్య కాలంలో బాగా పేరు పొందుతూంది.

ఇవన్నీ కొద్దిగా ఎగస్ట్రాగా అనిపించడం లేదూ… ఎగస్ట్రానే… ఏం చేస్తాం. పుర్రెకో బుద్ధి, జిహ్వకో రుచి అన్నారు మరి. ఈ బుడగా ఎప్పుడో‌ పేలుతుంది.

జూలై 8, 2008

వేగంగా మారుతున్న మొబైలు విపణి …

Posted in టెక్నాలజీ, మొబైలు, mobile, technology వద్ద 4:45 సా. ద్వారా Praveen Garlapati

మొబైలు మనకి కేవలం మాట్లాడుకునేందుకు కాక మరెన్నో చేసేదిగా ఎప్పుడో మారిపోయింది.

మొదట మనం ఒకరితో ఒకరు మాట్లాడుకోవడానికి ఉపయోగించేవాళ్ళం. తర్వాత ఎసెమెస్ లు వచ్చిన తర్వాత టెక్స్టింగ్ మొదలయింది. తర్వాత మొబైలుని పాటల కోసం వాడడం మొదలుపెట్టారు. ఇంకొంత కాలానికే అందులో కెమెరా, వీడియో వచ్చి చేరాయి.

కానీ ఇవే కాకుండా మోబైలు రంగాన్ని మార్చింది దీంట్లోంచి అంతర్జాలానికి అనుసంధానం కాగలగడం. ఇక అప్పటి నుంచీ మొబైలు వాడుకదారులలో అంతర్జాలం వాడకం విపరీతంగా పెరిగింది. మొదట్లో అంత వేగంగా లేకపోయినా ఇప్పుడు 3జీ (మూడో జనరేషన్) టెక్నాలజీ సహాయంతో చక్కని డాటా రేట్లను సాధించడం సాధ్యమయింది. ముందు ముందు వచ్చే 4జీ టెక్నాలజీ వల్ల ఇంకా అద్భుతాలు సాధ్యం కానున్నాయి. గిగాబిట్ దగ్గర వరకూ వేగాలు సాధించవచ్చు కూడా.

భారతంలో ఇంకా జీపీఆరెస్, ఎడ్జ్ ఉన్నాయి కానీ ఇంకా 3జీ రాలేదు. కాబట్టి ఆ వేగాలు అందుబాటులో లేకపోవచ్చు ఇప్పటి వరకూ. కానీ తొందర్లోనే ఆ పరిస్థితి మారనుంది.

ఇక ఈ వేగాల వల్ల వచ్చిన మార్పులేమిటంటే అప్పటి వరకూ మొబైలుని కేవలం ఇత్యాది పనులకు ఉపయోగించిన వారు ఇప్పుడు సర్ఫింగు, ఛాటింగు, సోషల్ నెట్వర్కింగు, మాప్స్ మొదలయిన వాటికోసం ఉపయోగించడం మొదలుపెట్టారు. అలాగే స్మార్టు ఫోన్ల ఉపయోగం పెరిగింది (బ్లాక్ బెర్రీ, ఐఫోను వంటివి)

ఆఫీసుకి సంబంధించిన మెయిళ్ళు, డాక్యుమెంట్లు ఫోనులోనే చూసుకునేలా ఏర్పాట్లున్నాయి ఇప్పుడు. ఎక్స్చేంజ్ వంటి ప్రొప్రయిటరీ ప్రోటోకాల్స్ వాడే మెయిల్ సర్వర్లకి కూడా అనుసంధానమయేట్టు వీలు ఉంది ఇప్పటి ఫోన్లలో.

దానికి తగ్గట్టు వాప్ ఆధారిత వెబ్‌సైట్లు చాలానే ఉన్నాయి. అలాగే మొబైలుకి తగ్గట్టుగా వెబ్‌సైట్లని డిజైన్ చెయ్యడం కూడా ఇప్పుడు సర్వ సాధారణం అయింది. (ఇది చాలా ముఖ్యం ఎందుకంటే మామూలు మానిటర్ల రిజల్యూషనుకి డిజైన్ చెయ్యబడిన పేజీలు మొబైలు లాంటి చిన్న స్క్రీను మీద సరిగా కనబడే అవకాశాలు తక్కువ.)
కాబట్టి దానికి తగ్గట్టు సింపుల్ డిజైన్‌లు తయారు చేస్తున్నారు.

ఉదా: గూగుల్ వాడివి చాలా సైట్లు మొబైలుకి సరిపడా రూపొందించబడ్డాయి.

గూగుల్ ముఖ పుఠ – http://m.google.com
జీమెయిల్ – http://m.gmail.com
గూగుల్ మాప్స్ – http://m.google.com/maps

పై లంకెలని సందర్శిస్తే మీకే అర్థమవుతుంది ఎలా కస్టమైజ్ చెయ్యబడ్డాయో. అవసరమయిన దానికంటే ఏ మాత్రం ఎక్కువ సమాచారం ఇందులో ఉండదు.

ఇదొక్కటే కాదు దాదాపు పెద్ద సైట్లన్నిటికీ మొబైలు కి సరిపడే వెబ్‌పేజీలు ఉన్నాయి.

యాహూ – http://in.m.yahoo.com/
జోహో – http://m.zoho.com
ఫేస్‌బుక్ – http://m.facebook.com/

ఫోన్లలో విహరించడానికి ప్రత్యేకించి విహరిణులు ఉంటాయి. అన్నిట్లోకీ ఎక్కువగా వాడబడేది ఓపెరా మినీ (డెస్కుటాపు విపణిలో పెద్దగా శాతం దక్కించుకోలేకపోయినా మొబైలులో మాత్రం అధిక శాతం ఓపెరాదే). విండోస్ వాడే మొబైల్ మీద ఐఈ ఉంటుంది. అలాగే ఐఫోన్ లో సఫారీ. ఇప్పుడు ఫైర్‌ఫాక్స్ కూడా మొబైలు కి తగ్గట్టుగా కొత్త విహరిణి ఒకటి సృష్టించే పని మొదలుపెట్టింది.

ఈ విహరిణులను ఉపయోగించి తేలికగా వెబ్‌సైట్లను సర్ఫ్ చేసుకోవచ్చు.

ఇవి ఇలా ఉంటే ఇంకో రకం మార్పులు కూడా మొదలయ్యాయి మొబైలు విపణిలో… అవి మొబైలు కోసం అప్లికేషన్లను సులభంగా తయారు చెయ్యడం కోసం SDK (Software Development Kit) లను విడుదల చెయ్యడం. మైక్రోసాఫ్టు వాడికి సొంత కిట్ ఉంది. అలాగే గూగుల్ ఈ మధ్యనే ఆండ్రాయిడ్ అని ఒక SDK ని రిలీజు చేసింది. (దీని ద్వారా మొబైల్స్ కోసం ఎన్నో రకాల అప్లికేషన్లు సృష్టించుకోవచ్చు. ఐఫోను కి ధీటుగా దీనినుపయోగించి అప్లికేషన్లను సృష్టించవచ్చని ఉవాచ.)
అలాగే ఆపిల్ కూడా ఐఫోను కోసం వాడి SDK ని విడుదల చేసింది.

(ఐఫోను కూడా ఐపాడ్ లాగా అద్భుతమయిన మార్కెట్టు సృష్టించుకుంది కానీ కొంత మంది సర్వీసు ప్రొవయిడర్లతో మాత్రమే టై అప్ అయింది. అయినా సరే ఐఫోను కోసం ప్రత్యేకమయిన వెబ్‌సైట్ ఇంటర్‌ఫేసులని కంపెనీలు సృష్టిస్తున్నాయంటేనే అది సాధించిన విజయం తెలుస్తుంది.)

వీటివల్ల ఏం జరిగుతుందంటే ఇప్పటి వరకూ ఊహించని అధ్బుతమయిన అప్లికేషన్లని చాలా సులభంగా తయారు చెయ్యవచ్చు (ఎన్నో మాషప్స్). అందుకని మొబైలు వాడకం ఇంకా ఆసక్తి కలిగించనుంది.

వెబ్ వాడకం ఎలాగయితే పెరిగిందో అలాగే మొబైలు మార్కెట్టు కూడా పెరుగుతుందని అంచనాలు వేస్తున్న కంపెనీలు చక్కని ప్రణాళికలతో వారి SDK లను ఉపయోగించి మొబైలు మార్కెట్టు మీద పట్టు సాధించాలని ప్రయత్నిస్తున్నాయి. (దీని వల్ల ముందు ముందు ప్రకటనలు గట్రా చొప్పించడానికి వీలు కల్పించుకోవడం అన్నమాట.)

పనిలో పనిగా మంచి మొబైళ్ళు కూడా కొనగలిగే ధరకి లభిస్తుండడంతో (అఫర్డబులిటీ కూడా పెరగడంతో) ఎక్కువ మంది జనం ఉపయోగించడానికి ఆసక్తి చూపుతున్నారు.

జూన్ 27, 2008

మీ బ్లాగరు బ్లాగుని వర్డుప్రెస్సు లోకి మార్చుకోవడం ఎలా ?

Posted in టెక్నాలజీ, బ్లాగరు, వర్డుప్రెస్సు, సాంకేతికం వద్ద 7:21 సా. ద్వారా Praveen Garlapati

మన తెలుగు బ్లాగర్లలో ఎక్కువ మంది బ్లాగరు లేదా వర్డుప్రెస్సులో బ్లాగుతుంటారు.

బ్లాగరు మనకు కావలసినట్టు తీర్చిదిద్దుకోవడానికి, అన్ని అమరికలు చేసుకోవడానికీ అనువయినది.
వర్డుప్రెస్సు లే మాన్ కూడా అనాయాసంగా నిర్వహించగలిగినది.

కొద్దిగా కస్టమైజేషనూ వగయిరా చేసుకోవాలంటే బ్లాగరే బాగుంటుంది. అందుకే బ్లాగరులో ఎంతో అందంగా డిజైన్ చెయ్యబడిన థీములు, జనాలు జోడించుకునే ఆరెసెస్ లంకెలు, వగయిరా అందుబాటులో ఉంటాయి.
కానీ వర్డుప్రెస్సు.కాం లో అంతగా కుదరవు (మీ సొంత ఇన్స్టాలేషనయితే కుదురుతుంది). కానీ డీఫాల్టు థీములు వర్డుప్రెస్సులోనే బాగుంటాయి, ఎన్నుకోవడానికి సులభం కూడా.

అయితే ఇక్కడ ఒక కష్టం ఏమిటంటే ఒక చోట మొదలుపెట్టిన బ్లాగు వివిధ కారణాల వల్ల అందులోనే ఉండవలసి వస్తుంది.

౧. ఒక దాని నుంచి ఇంకొక ప్రవయిడరుకి మారితే మన టపాలు, వ్యాఖ్యలు అన్నీ పోతాయి గనుక.
౨. ఇన్నాళ్ళ నుంచి మనం సంపాదించుకున్న ఒక ఐడెంటిటీ పోతుంది గనుక.
౩. సెర్చ్ ఇంజన్లలో బ్లాగు రాంకు మళ్ళీ మొదటి నుంచీ మొదలవుతుంది గనుక.

అయినా కానీ ఒక ప్రొవయిడరు నుంచి ఇంకొక దానికి మారగలిగితే బాగుంటుంది కదూ…

అలాంటి సదుపాయం వర్డుప్రెస్సులో ఉంది. మీ బ్లాగరు, ఇంకా చాలా ఇతర బ్లాగులలో నుంచి టపాలను వ్యాఖ్యల సహితంగా వర్డుప్రెస్సులోకి దిగుమతి చేసుకోవచ్చు.

అదెలాగో చూద్దాము.

(అన్నట్టు ఈ సోపానాలు మీ సొంతంగా హోస్టు చేసిన బ్లాగుకయినా, వర్డుప్రెస్సు.కాం లో ఉన్న బ్లాగుకయినా ఒకటే.)

౧. మీరు మీ వర్డుప్రెస్సు అకౌంటులోకి లాగిన్ అవండి. మీ ప్రొఫైలు అమరికలలో గనుక “తెలుగు” ని ఎంపిక చేసుకునుంటే మీకు కూడా జాబితాలూ, అవీ తెలుగులో కనిపిస్తాయి.

ఒకవేళ చేసి లేకపోతే ఇప్పుడు చెయ్యండి.

అలా చెయ్యడానికి మొదట My Account > Edit Profile కి వెళ్ళండి.

అక్కడ Interface Language ని te-తెలుగు గా ఎంచుకోండి.

౨. ఇప్పుడు నిర్వహణ అనే లంకె మీద నొక్కండి.

౩. దాని కింద దిగుమతి > బ్లాగర్ మీద నొక్కండి.

౪. అక్కడ మీ బ్లాగరు సంకేత నామం (Username), రహస్య నామం (Password) ఇచ్చి మీ బ్లాగరు బ్లాగుని జోడించండి.

౫. ఇప్పుడు బ్లాగరులో మీరు రాస్తున్న బ్లాగులన్నీ చూపించబడతాయి.

౬. మీకు కావలసిన బ్లాగు పక్కన ఉన్న “దిగుమతి” అనే బొత్తాన్ని నొక్కండి.

అంతే మీ టపాలు, వ్యాఖ్యలు బ్లాగరు లో నుంచి వర్డుప్రెస్సులోకి దిగుమతి అయిపోతాయి. అంతే…
ఇక నుండి వర్డుప్రెస్సులో బ్లాగు చేసుకోవచ్చు.

ఈ పద్ధతి ద్వారా ఇప్పుడు మీకు బ్లాగరు నచ్చకపోతే వర్డుప్రెస్సుకి మారవచ్చు. అలాగే కావాలంటే మీ బ్లాగరు బ్లాగుకో మిర్రరు బ్లాగు ఏర్పరచుకోవచ్చు. (అలా చేసిన నా మిర్రరు బ్లాగు ఇక్కడ చూడవచ్చు.)

ఇది చూడండి:

అన్నట్టు మీరు గమనించి ఉంటారు. వర్డుప్రెస్సు తెలుగు అనువాదాలు పూర్తిగా లేవని. కొంత ఆంగ్లంలో కనిపిస్తుంది.
దానిని సరి చెయ్యాలంటే మీరు తెలుగు అనువాదంలో పాలుపంచుకోవచ్చు. ఇక్కడ నుంచి కూడా చెయ్యవచ్చు.
(తెలియని వారికోసం: వర్డుప్రెస్సు ఒక ఓపెన్ సోర్స్ సాఫ్ట్‌వేర్. మీరు దానిని ఉచితంగా పొందవచ్చు, వాడుకోవచ్చు. కాబట్టి మీరు చేసే అనువాదాలు మీకు లభించే ఓపెన్ సోర్స్ వర్షనులో కూడా పొందుపరచుకోవచ్చు.)

జూన్ 18, 2008

మంట నక్క ౩, ఇతరాలు …

Posted in ఒపెరా, టెక్నాలజీ, ఫైర్‌ఫాక్స్, మంటనక్క, firefox, opera వద్ద 5:14 సా. ద్వారా Praveen Garlapati

మొత్తానికి మంట నక్క ౩ విడుదలయింది. వారు స్థాపించదలచుకున్న ఐదు మిలియన్ల దిగుమతుల రికార్డు ఎప్పుడో దాటేసారు (ఇప్పటికి ఎనిమిది మిలియన్లు దాటింది). వివరాలు ఇక్కడ.

నిన్న అందరూ ఒకే సారి దిగుమతి చేసుకోవడానికి ప్రయత్నించడంతో దాని సర్వరు డౌనయింది కూడా. రాత్రి ఆన్లైనులో కనబడిన వారందరికీ దిగుమతి చేసుకోమని ప్రచారం చేసి నా వంతు నేను చేసాను (నేను కూడా దిగుమతి చేసుకున్నాను). అన్నట్టు వీవెన్, నేను రాత్రి స్టాట్స్ పేజీని ఒకటే తాజీకరించడం. నిముషానికి ఎన్ని దిగుమతులవుతున్నాయో చూడడానికి 🙂

ఎన్నో చక్కని ఫీచర్లతో, మెరుగుపరచబడిన మెమొరీ వాడకంతో ఆకట్టుకునేదిగా ఉంది. అన్ని ఫీచర్లనూ తెలుసుకోవడానికి ఓ సారి ఇక్కడికెళ్ళండి.

అన్నిటి కన్నా మంచి సదుపాయం మనం ఇంతకు ముందు వెళ్ళిన పేజీల సంగ్రహాన్ని సులువుగా వెతకడానికి జత చేసిన ఫీచర్లు.

మీరు మీ URL bar లో ఏదయినా కీ పదాన్ని టైపు చెయ్యగానే అది మీరు ఇంతకు ముందు వెళ్ళిన పేజీలలో ఆ పదం ఎక్కడెకడుందో ఆ పేజీలను మీకు వెంటనే చూపిస్తుంది.

అలాగే మీరు తరచుగా వెళ్ళే పేజీలను ఆటోమేటిగ్గా Places, Smart Bookmarks, Most Visited అనే ఫోల్డర్లలో పెడుతుంది. పేజీకలను (bookmarks) ను స్థాపించుకోవడం కూడా చాలా ఈజీ. మీరు ఏ పేజీనయితే పేజీకగా మార్చదలచుకున్నారో ఆ పేజీకి వెళ్ళి URL bar లో ఉన్న నక్షత్రం బొమ్మని క్లిక్కుమనిపించండి. అంతే అది పేజీకగా మారిపోతుంది. అలాగే మీ పేజీకలకు టాగులని పెట్టుకోవచ్చు. నక్షత్రం గుర్తు మీద రెండు సార్లు నొక్కండి. అక్కడ మీకు కావలైసిన టాగులను దానికి జోడించండి.

ఇంకా కొత్త ఫీచర్లును ఎలా ఉపయోగించాలో తెలుసుకోవడానికి ఇక్కడ, ఇక్కడ చూడండి.

అన్నట్టు కొసరుగా ఓ రెండు చక్కని ఆడాన్‌ ల గురించి ఈ సందర్భంగా చెబుతాను.

౧. వీవ్: ఇది ఇంకా పూర్తిగా విడుదల అవలేదు. ఇంకా మోజిల్లా లాబ్స్ లోనే ఉంది. అంటే దీనిని ఇంకా పరీక్షిస్తున్నారు. కానీ చక్కని ఆడాన్ ఇది.

మీరు చాలా సార్లు అనుకునుంటారు మీ పేజీకలు, వెబ్ పేజీల చరిత్ర, కుకీలు, మంట నక్కలో నిక్షిప్తం చేసుకున్న సంకేత పదాలూ మీరెక్కడి నుంచి పని చేసినా అక్కడికొచ్చేలా ఉంటే బాగుండునని. సరిగా దానికోసం సృష్టించబడిన ఆడాన్ ఇది.

దీని కోసం మీరు ఒక మోజిల్లా లాబ్స్ లో ఒక ఖాతా సృష్టించుకోవాల్సి ఉంటుంది. తర్వాత మీ మంట నక్క విహరిణి లో దానిని నిక్షిప్తం చేసుకుంటే అప్పటి నుంచీ పైన చెప్పినవన్నీ దాని సర్వరులో పెట్టుకుంటుంది (ఎన్‌క్రిప్ట్ చేసి పెట్టుకుంటుంది.)

మీకు ఇవన్నీ ఇంకొక సిస్టం మీద పని చేసేటప్పుడు కావాలనుకోండి, ఆ సిస్టం లో ఉన్న మంట నక్క కి వీవ్ ఆడాన్ ని జత చెయ్యండి. మీ లాగిన్ వివరాలు అందిస్తే అన్నిటినీ కొత్త సిస్టం లోకి తెచ్చేసుకుంటుంది.

మీరు Tools > Weave > Weave Preferences కి వెళ్ళి కావలసిన ఎంపికలను చేసుకోండి.

అంతే కాదు ఇక నుంచి మీరు కొత్తగా జోడించిన పేజీకలు వగయిరా అన్నీ కూడా వీవ్ ఉన్న అన్ని సిస్టం ల మీదా లభ్యమయ్యేలా చూస్తుంది.

మీ పని సులభతరం చేస్తుంది కదూ. ప్రయత్నించి చూడండి.

౨. రీడిట్ లేటర్: ఈ ఆడాన్ కూడా మీ మంట నక్కకి చక్కని జోడింపు.

ఎన్నో సార్లు మీరు అంతర్జాలంలో విహరించేటప్పుడు కావలసిన పేజీలు అన్నీ అప్పటికప్పుడే చదవడం కుదరదు. అలాగని అంత సేపూ మీరు అంతర్జాలానికి అనుసంధానమయ్యి ఉండలేరు. సరిగా ఆ సమస్యను పరిష్కరించడానికే ఈ ఆడాన్.

దీనిని మీ మంట నక్కలో వ్యవస్థాపితం చేసుకోండి. తర్వాత మీకు URL bar లో ఒక టిక్కు మార్కు కనిపిస్తుంది. మీరు ఏ పేజీనయితే తర్వాత చదవదలచుకున్నారో ఆ పేజీలో టిక్కు మార్కుని నొక్కండి. ఆ లంకె వెంటనే రీడిట్ లేటర్ జాబితాలో చేరిపోతుంది. (మీరు ప్రస్తుతం చూస్తున్న అన్ని టాబులనూ, విడి విడిగా లంకెలనూ కూడా ఇందులో చేర్చుకోవచ్చు)

అయితే మీరు ఎంచుకున్న పేజీలు మీరు అంతర్జాలానికి అనుసంధానమయి లేనప్పుడు కుడా లభ్యం కావాలంటే మీరు దాని మెనూ కి వెళ్ళి “Read Offline” అనే లంకె మీద నొక్కండి. అది మీకు కావలసిన పేజీలన్నిటినీ మీ సిస్టం లో నిక్షిప్తం చేసుకుంటుంది. తర్వాత మీరు అంతర్జాలానికి దూరమయినా దాని మెనూ కి వెళ్ళి ఆ లంకె మీద నొక్కితే ఆ పేజీ మీకు లభ్యమవుతుంది.

అక్కర్లేదనుకున్న పేజీల నుంచి టిక్కు మార్కు తొలగిస్తే ఆ పేజీ ఇక లభ్యమవదు.

భలేగా ఉంది కదూ.

అందుకే మరి మంట నక్క లాంటి విహరిణులు వాడాలి. మరిన్ని చక్కని ఆడాన్‌ లు స్థాపించుకుని మీ విహరిణిని మరింత శక్తిమంతంగా తయారు చేసుకోండి.

ఇది చూడండి: అన్నట్టు నా లాగా ఒకటి కంటే ఎక్కువ విహరిణులు వాడే వారు ఓపెరా 9.5 ని ప్రయత్నించి చూడండి. దాని వేగం ముందు ఏ విహరిణి అయినా దిగదుడుపే. అదీ కాక ఏ ఆడాన్ లు లేకుండానే అది ఎన్నో ఫీచర్లను అందిస్తుంది. అవేమిటో ఇక్కడ చూడండి.
కొత్త రూపుతో ఆకట్టుకునేలా తయారు చేసారు కూడా.

ఏప్రిల్ 25, 2008

కుబుంటు హార్డీ హెరాన్ …

Posted in ఉబుంటు, కుబుంటు, టెక్నాలజీ, లినక్సు వద్ద 5:26 సా. ద్వారా Praveen Garlapati

ఉబుంటు/కుబుంటు మరో సరికొత్త రిలీజుతో ఆకట్టుకుంది. సరికొత్తగా విడుదలయిన రిలీజు పేరు “హార్డీ హెరాన్“.

ఉబుంటు/కుబుంటు గురించి తెలియని వారికి, ఇది ఒక లినక్సు డిస్ట్రిబ్యూషను. డెబియన్ డిస్ట్రిబ్యూషను నుంచి వచ్చినది. ప్రతీ ఆరు నెలల రిలీజుతో “యూజబిలిటీ” మీద ప్రత్యేక దృష్టి కేంద్రీకరిస్తూ దూసుకుపోయే ఒక మంచి డిస్ట్రిబ్యూషను ఇది.
గత కొద్ది ఏళ్ళుగా డేస్క్‌టాప్ పైన విండోసుకి బలమయిన ఉచిత ప్రత్యామ్నాయంగా ఎదిగిన ఆపరేటింగ్ సిస్టం ఇది.

అన్నట్టు ఇది ఒక ఎల్టీఎస్ (Long Term Support) రిలీజు. అంటే ఒక మూడేళ్ళ వరకూ సపోర్టు ఉండే రిలీజన్నమాట. అదీ ఉబుంటు సమస్యలను ఎంత తొందరగా పరిష్కరిస్తుందో వాడిన వారందరికీ తెలిసే ఉంటుంది.

ఈ రిలీజుతో పాటు ఎన్నో చక్కని ఫీచర్లు వచ్చాయి. కొన్ని ఈ కింద.

అన్నిటికన్నా నాకు బాగా నచ్చింది

వుబీ ఇంస్టాలర్: ఎందుకంటారా ? దీని ద్వారా ఇప్పుడు విండోసులోనే ఉబుంటు ని స్థాపించుకోవచ్చు. అంటే మీకు మరో పార్టీషను లేకపోయినా ఫరవాలేదు. మీరు చెయ్యవలసిందల్లా ఈ ఉబుంటు/కుబుంటు సీడీ దొరకబుచ్చుకుని విండోసులో తెరవండి. మీకు ఒక చిన్న విజర్డ్ ని చూపిస్తుంది. దానినుపయోగించి ఉబుంటుని విండోసులో ఒక అప్లికేషనులాగా ఇంస్టాల్ చేసుకోవచ్చు.

ఈ కింది బొమ్మ చూడండి.

ఉబుంటు కి ఎంత స్థలం కేటాయించాలనుకుంటున్నారో చెప్పండి. అంతే. ఒక సారి రీబూట్ అవగానే మీ సిస్టమ్‌ లో ఉబుంటు స్థాపితమయిపోతుంది.
కంప్యూటరు బూటవుతున్నప్పుడు ఉబుంటు/కుబుంటు ఎంచుకోండి. ఝామ్మని వాడెయ్యండి.

ఇప్పుడర్థమయిందా ? నాకెందుకు నచ్చిందో. విండోసు వాడుకదారులని లినక్సుకి మరల్చడంలో ఇదెంతో సహాయపడుతుందని నా నమ్మకం. అంత రూఢిగా ఎలా చెబుతున్నానంటారా ? ఇప్పటికే నలుగురిని ఇలా మార్చా కాబట్టి 🙂 (అందులో మన రానారె ఒక్కడు)

ఇంకా ఈ రిలీజులో కేడీయీ ౪ ఇంటిగ్రేట్ చెయ్యబడి ఉంది. అదేంటంటారా ? నా ఇంతకు ముందు టపా ఓ సారి చదవండి.

కేడీయీ ౪ సరికొత్త రూపం. కొత్త ప్రయోగం. ఇప్పుడిప్పుడే విడుదలవుతుంది గనుక రఫ్ గా ఉంటుంది. కానీ ఇప్పుడే ఇలా ఉంటే రేప్పొద్దున్న ఎంత ఎక్సైటింగుగా ఉంటుందో ఓ సారి ఊహించుకోండి.

విడ్జెట్లు, ఎఫెక్ట్లతో తప్పకుండా ఆకట్టుకుంటుంది.

ఇకపోతే కాంపిజ్ కి చెందిన డెస్క్‌టాప్ ఎఫెక్ట్లు ఇప్పుడు కేడీయీలో సులభంగా ఎంచుకోవచ్చు.

లినక్సు లో ఇంటర్ఫేసు కి హంగులు లేవని అనే వారికి ఇవి చూసిన తరువాత దిమ్మతిరుగుతుంది. కాంపిజ్ ద్వారా ఎలాంటి ఎఫెక్ట్లు మీకు లభ్యమవుతాయో మచ్చుకు ఈ లంకెలో ఉన్న తెరచాపలను చూడండి.

ఇవి కొన్ని ఫీచర్లూ, మార్పులూ మాత్రమే. ఉబుంటు ని స్థిర పరచడానికి, ముందు ముందు చక్కని రిలీజులు చెయ్యడానికి మన కంటికి కనిపించని ఎంతో పని ఈ రిలీజు మీద జరిగింది.

పూర్తి ఫీచర్ల గురించి తెలుసుకోవాలంటే ఈ లంకె చూడండి.

అన్నట్టు మీకు తెలియకపోతే ఉబుంటు/కుబుంటు సీడీలు మీకు ఉచితంగా పంపిణీ చెయ్యబడతాయి. ఎన్ని కావాలంటే అన్ని. ఇక్కడకెళ్ళి అడగొచ్చు. అందరికీ పంచగలిగినన్ని సీడీలు తెప్పించుకుని అందరికీ ఇవ్వవచ్చు. అంత వరకూ ఆగలేకపోతే దీనిని ప్రయత్నించి చూడడానికి మీకయ్యే ఖర్చల్లా ఒక్క సీడీ మాత్రమే. ఇక్కడ నుంచి ఐఎస్‌ఓ ని తెచ్చుకుని సీడీ తయారు చేసుకోండి. అంతే.

కుబుంటు ని ఎలా వాడాలో కొత్తగా వాడేవారికి నా ఈ టపా ఉపయోగపడవచ్చు.

మరోసారి జై బోలో కుబుంటు కీ !

మార్చి 20, 2008

సెమాంటిక్ వెబ్, సెర్చ్ …

Posted in టెక్నాలజీ, సాంకేతికం, సెమాంటిక్ వెబ్, సెమాంటిక్ సెర్చ్, semantic search, semantic web వద్ద 5:43 సా. ద్వారా Praveen Garlapati

మనం సెమాంటిక్ వెబ్, సెర్చ్ అని వింటూంటాము. అసలు ఏమిటవి ?

సెమాంటిక్ వెబ్ అంటే :

ఎందుకు ?

దీనికి సమాధానం కావాలంటే కొంత బాక్‌గ్రౌండ్ అవసరం.

అనేక ఏళ్ళుగా మనకు అంతర్జాలం (internet) ఉంది. ఇందులో సమాచారం కొన్ని బిలియన్‌ల కొద్దీ వెబ్ పేజీలలో నిక్షిప్తమై ఉంది.
ఇదంతా మనకి ఉపయోగపడేదే. కానీ ఆ సమాచారం అంతా ఒక పద్ద్హతి ప్రకారం ఉంచబడలేదు.

ఉదా: ఇవాళ నేనొక సినిమ రివ్యూ రాస్తున్నాననుకోండి. నాకిష్టమొచ్చినట్టు నేను రాయచ్చు.

నేనో సినిమా చూసాను. అది చెత్తగా ఉంది. దాని దర్శకుడు ఎవడో వెధవ. దాంత్లో నటీ నటులు కోంకిస్కా గొట్టం గాళ్ళు. కథ ఏమీ లేదు.

అందులో సినిమా గురించిన సమాచారం ఉంది. కానీ ఓ పద్ఢతి ప్రకారం లేదు. దానినే ఈ విధంగా రాసాననుకోండి.

నేనొక సినిమా చూసాను
పేరు: అనవసరం. దీనికో పేరు కూడానా ?
దర్శకుడు: ఎవడో‌ వెధవ
నటీనటులు: కోంకిస్కా గొట్టం గాళ్ళు
కథ: ఏమీ లేదు

ఇప్పుడు అర్థం చేసుకోవడానికి తేలికగా లేదూ ? అంటే పద్ఢతి ప్రకారం ఉంచిన సమాచారం మరింత ఉపయోగకరం అన్నమాట.

పైన చెప్పిన విధంగా నేను రివ్యూ రాసాననుకోండి అది ఉపయోగంగా ఉంది కదా. మరి ఆ రివ్యూ ని అలాంటి పద్ఢతిలోనే అందరూ రాస్తే ?
అప్పుడు మీకు రివ్యూలు చదువుకోవడమూ, కనుగొనడమూ తేలిక కాదూ ?

ఏమిటి ?

ఇలాంటి సమస్యను పరిష్కరించడానికే సెమాంటిక్ వెబ్ తెర మీదకి వచ్చిందన్నమాట.
సమాచారానికి ఓ అర్థాన్ని ఆపాదించడానికి కొన్ని ఫార్మాట్లు రూపొందించబడ్డాయి, రూపొందించబడుతున్నాయి.
అవే ఈ సెమాంటిక్ వెబ్ కి ఆధారం.

ఉదా: మైక్రోఫార్మాట్లు, ఆర్డీఎఫ్.

ఎలా ?

ఈ సమాచారాన్ని పద్ఢతీకరించే సమస్యను ఈ సెమాంటిక్ వెబ్ పైన చెప్పుకున్న కొన్ని ఫార్మాట్లను ఉపయోగించి పరిష్కరించాలనుకుంటుంది.
అదెలా అంటే మనం చేసే కొన్ని రొటీను పనులకి ఫార్మాట్లు సృష్టించబడ్డాయి.

ఉదా: రివ్యూలకి hReview, విజిటింగ్ కార్డులకి, అడ్రసులకి hCard మొదలయినవి.

అలాగే వెబ్‌ పేజీలకు సంబంధించి మెటా సమాచారం ఉంచడానికి మనకు హెచ్టీఎమెల్ లో మెటా టాగులున్నట్టే వెబ్ కోసం ఆర్డీఎఫ్ అనే స్టాండర్డుని w3c తయారు చేసింది. ఇది సమాచారం మధ్య సంబంధాలని విశదీకరించేందుకు ఉపయోగపడుతుంది.

ఈ పేజీ ఇందుకోసం. ఇందులో ఈ సమాచారం ఉంది. మరి కొంత సమచారం ఇక్కడ దొరుకుతుంది. దీని రచయిత ఫలానా. లాంటివి. నా బ్లాగుకి ఆర్డీఎఫ్ ఈ కింది విధంగా రాయవచ్చు.

<rdf:RDF
xmlns:rdf=”http://www.w3.org/1999/02/22-rdf-syntax-ns#&#8221;
xmlns:dc=”http://purl.org/dc/elements/1.1/”&gt;
<rdf:Description rdf:about=”http://praveengarlapati.blogspot.com”&gt;
<dc:title>నా మదిలో …</dc:title>
<dc:publisher>ప్రవీణ్ గార్లపాటి</dc:publisher>
</rdf:Description>
</rdf:RDF>

దీని వల్ల ఉపయోగం ??

ఇంత కష్టపడి ఇవన్నీ చేస్తే ఇది ఎలా ఉపయోగం అనే సందేహం ఎవరికన్నా వస్తుంది.

దీనిని ఒక కాంటెక్స్టులో చూద్దాము.

సెర్చ్ ఇంజను ఎలా పని చేస్తుంది ? వెబ్ పేజీలను క్రాల్ చేసి.

అంటే దానికి దొరికిన లంకెలన్నిటినీ ఓ పద్ఢతి ప్రకారం అనుసరించి వాటి నుంచి సమాచారం వెలికి తీసి వెతకడానికి అనువుగా ఉంచుతుంది.
అయితే ఇక్కడ దానికి ముఖ్యమయినవి లంకెలు, కీ వర్డ్సు. అంటే మీరు ఒక వెబ్ పేజీ సృష్టిస్తే దాంట్లో అర్థం కంటే కీ వర్డ్లకే ప్రాధాన్యం ఎక్కువ. ఎవరయినా ఆ కీ వర్డ్ల కోసం వెతికితే మీ వెబ్ పేజీల సంగ్రహం నుంచి సేకరించిన కీ వర్డ్ల సహాయంతో వాటిని పోల్చి మీ వెబ్‍ పేజని సెర్చ్ రిజల్ట్లలో చూపిస్తుంది.

ఈ విధానంలో ఎన్నో లోపాలున్నాయి. ఎందుకంటే మనం సెర్చ్ చేసిన సమాచారాన్ని కాంటెక్స్టులో చూడట్లేదు ఈ సెర్చ్ ఇంజన్లు.

ఉదా: మీరు “What is telugu ?” అని సెర్చ్ చేసారనుకుందాము. అప్పుడు నేను ఆశించేది తెలుగు భాష గురించిన సమాచారం. అది ఎలాంటి భాష ? ఎక్కడ మాట్లాడుతున్నారు ? దాని పుట్టుపూర్వోత్తరాలు ఏమిటి ? మొదలయినవి.

కానీ ఇప్పుడు జరిగేది ఏమిటంటే “telugu” అనే కీ వర్డు ఏ పేజీలో ఉందో. ఏ పేజీకి ఎక్కువ క్రెడిబిలిటీ ఉందో అది ముందు చూపించడం జరుగుతుంది. దాని వల్ల నేను కోరుకున్న సమాచారం నాకందట్లేదు.

గూగుల్, యాహూ, లైవ్ మొదలయినటువంటి సెర్చ్ ఇంజన్లు ఎన్నాళ్ళ నుంచో ఈ కాంటెక్స్టుని బట్టి సెర్చ్ ని మెరుగు పరచడానికి ప్రయత్నాలు చేస్తున్నాయి. కానీ ఇంత వరకూ పెద్దగా విజయం సాధించలేకపోయాయనే చెప్పుకోవాలి.

ఆ ఖాళీలను పూరించడానికి కొత్తగా సెమాంటిక్ సెర్చ్ ఇంజన్లు పుట్టుకొచ్చాయి. హాకియా, పవర్‌సెట్ మొదలయినవి.

ఇవి అలాంటి సెమాంటిక్ సెర్చ్ ని సాధ్యం చెయ్యడానికి ప్రయత్నిస్తున్నాయి.

కొన్ని నాచురల్ లాంగ్వేజీ ప్రాసెసింగుని ఆసరాగా తీసుకుంటే కొన్ని స్టాండర్డ్సుని ఇండెక్సు చేస్తున్నాయి. ఇంతకు ముందు చెప్పుకున్న ఆర్డీఎఫ్ స్తాండర్డుని ఇండెక్సు చెయ్యడం ద్వారా దీనిని సాధ్యం చెయ్యడానికి ప్రయత్నిస్తున్నాయి.

ఆర్డీఎఫ్ స్టాండర్డు వెబ్‌ పేజీల సమాచారాన్ని సెర్చింజన్‌లు మరింత సులువుగా అర్థం చేసుకోవడానికి ఉపయోగపడతాయి.

స్థూలంగా అదీ సెమాంటిక్ వెబ్ గురించి.

అయితే వీటిలో ముఖ్యమైందేమిటంటే ఏ స్టాండర్డు విజయం అయినా అది ఎంత వరకూ అడాప్ట్ అయిందో అన్నదాని మీదే ఆధారపడి ఉంటుంది. అంటే ఇప్పుడు వెబ్‌ సైటు ఓనర్లు తమ వెబ్ పేజీలలో ఈ ఆర్డీఎఫ్, మైక్రోఫార్మాట్స్ వంటివి ఉపయోగిస్తేనే సెమాంటిక్ వెబ్ సాధ్యపడుతుంది. అలా చెయ్యాలంటే వారికి ఏదో‌ ఒక తాయిలం కావాలి. ఏమిటది ?

ఇంతవరకూ సెర్చింజన్‌లు వీటిని ఇండెక్సు చేసి అర్థం చేసుకోవడానికి ప్రత్యేకంగా ప్రయత్నించట్లేదు. కానీ ఈ మధ్య ఆ దిశలో సరయిన ప్రయత్నాలు మొదలయ్యాయి. ఇంతకు ముందు చెప్పుకున్న సెమాంటిక్ వెబ్‌ సెర్చ్ ఇంజన్‌లు ఒక రకమయితే ఈ మధ్యే యాహూ వారు ఈ సెమాంటిక్ వెబ్ కి సంబంధించిన స్టాండర్డులని ఇండెక్సు చేస్తామని ప్రకటించారు.

యాహూ గూగుల్ ని ఢీ కొట్టడానికి సరికొత్త వ్యూహాల్ని రంగంలోకి దించుతూంది. అవి సరయిన దిశలో ఉన్నాయి కూడా. దాని సెర్చ్ ని ఓపెన్ చేయ్యడానికి సన్నాహాలు మొదలెట్టింది. ఇప్పుడు సెమాంటిక్ సపోర్టు.

సెర్చ్‌లో గూగుల్ మొదటి సారి కాచప్ మొదలుపెట్టాలేమో ?

* ఆర్డీఎఫ్ ని వివిధ రకాలుగా ఉంచవచ్చు. అందులో ఒక విధానం

<link rel=”alternate” type=”application/rdf+xml” href=”linktordf.rdf” />

పైన చెప్పింది ఒక స్టాటిక్ ఆర్డీఎఫ్ ఫైలుని మీ వెబ్‌ పేజీలో ఉంచుకోవడం కోసం.
అలాగే డైనమిక్ గా ఆర్డీఎఫ్ ఫైళ్ళని జెనరేట్ చేసే విధానాలు కూడా ఉన్నాయి. కానీ నాకు వాటి మీద అంత అవగాహన లేదు.

ఆర్డీఎఫ్ మీద కొంత అవగాహన కోసం మీరు w3schools లో ఈ వ్యాసం చదవవచ్చు.
అలాగే ఆర్డీఎఫ్ లో ఏ ఎలిమెంట్స్ ఉండచ్చు అనే సమాచారం కోసం మీరు ఈ లంకె చూడండి.

* ఆర్డీఎఫ్ ని కొన్ని/చాలా ?? వెబ్‌ సైట్లు ఇప్పటికే అమలు చేస్తున్నాయి.

ఒక ఉదాహరణ లైవ్‌జర్నల్. ఇది FOAF (Friend Of a Friend) అనే ఒక ఆర్డీఎఫ్ ఫార్మాటుని వాడుతుంది.

ఆర్డీఎఫ్ ని వినూత్నంగా ఎలా వాడవచ్చో అన్నదానికి ఇదో ఉదాహరణ. ఎందుకంటే FOAF ప్రాజెక్టు ద్వారా మీ స్నేహితులు, వారి స్నేహితుల మధ్య సంబంధాలను చిత్రీకరించవచ్చు.

మీరు ఏదయినా లైవ్‌జర్నల్ బ్లాగు మొదటి పేజీలో చూస్తే ఇలాంటి ఒక టాగు ఉంటుంది

<link rel=”meta” type=”application/rdf+xml” title=”FOAF” href=”http://praveenkumarg.livejournal.com/data/foaf&#8221; />

దానర్థం ఏమిటంటే ఆ లంకెలో ఆ బ్లాగు యొక్క స్నేహితుల సమాచారం ఆర్డీఎఫ్ ఫార్మాటులో ఉంటుందని. ఇప్పుడు ఒక వేళ ఈ సమాచారాన్ని సెర్చ్ ఇంజన్ లు గానీ ఇంకే ఇతర అప్లికేషన్‌ లు గానీ చదివితే నా స్నేహితులు ఎవరని అర్థమవుతుంది.

ఇది మంచా, చెడా అని మాత్రం నన్నడక్కండి. సమాధానం కాంటెక్స్టులో చూడాలి 🙂

గత పేజీ · తర్వాతి పేజీ